11 тыһыынча кырачаан 2023 сылга Саха сиригэр төрөөбүт

Саха сиригэр ааспыт 2023 сылга уопсайа 11 087 кырачаан күн сирин көрбүт, ол иһигэр: 5 627 уол, 5 460 кыыс, 111 икки игирэ, 1 үс игирэ. Бэлиэтээн эттэххэ, саамай элбэх, 884 оҕо сыл бүтэһик ыйыгар төрөөбүт: 437 уол уонна 447 кыыс. 
СӨ ЗАГС управлениетын чахчытынан, 2023 сылга төрөппүттэр ордук чаастатык уолаттарын Матвей, Тимур, Александр, Максим, Марк, Мирон, Артём, Владимир, Михаил уонна Роман, кыргыттарын София, Виктория, Ева, Мичийэ, Анна, Алиса, Амелия, Амина, Варвара уонна Мия диэн ааттарынан сүрэхтээбиттэр.
Оттон сэдэх ааттарынан уолаттарга Аким, Вадим, Гаврил, Демид, Леонид, Никита, Платон, Родион, Святослав, Трофим, кыргыттарга Алексия, Вилена, Есения, Ксения, Лера, Майя, Нина, Олеся, Снежанна уонна Яна буолбуттар. 
Санатар буоллахха, Саха Өрөспүүбүлүкэтэ Уһук Илин регионугар уонна Арассыыйа субъектарыгар оҕо төрөөһүнүгэр инники күөҥҥэ сылдьар, былырыын Ыһыах күн нэһилиэнньэбит ахсаана 1 мөлүйүөн киһиэхэ тиийбитин бэлиэтээбиппит. Нэһилиэнньэ үйэтэ эмиэ Арассыыйа орто көрдөрүүтүн куоһаран, 73,5 сааска тиийдэ, диэн иһитиннэрэр СӨ Баһылыгын уонна Бырабыыталыстыбатын пресс-сулууспата.