1-кы оскуола саҥа дьиэни туруорсар

Евгений Григорьев Октябрьскай уонна Киин уокуруктар олохтоохторун көрдөһүүлэринэн Дьокуускай куорат 1 №-дээх орто оскуолатын салалтатын уонна төрөппүт кэмитиэтин кытта көрүстэ.

Дириэктэр Таисия Горохова бэлиэтээбитинэн, 1941 сыллаахха тутуллубут  оскуола дьиэтэ олус эргэрдэ. Кини 12 сыл устата салалтаттан көмө көрдүү сатаабыттарын, боппуруос күн бүгүҥҥэ диэри быһаарылла илигин кэпсээтэ.

Мунньах кыттыылаахтара оскуоланы бөҕөргөтөр, чөлүгэр түһэрэр үлэ бырайыагын, сметатын, экспертиза түмүгүн, о.д.а. докумуоннары көрдүлэр-иһиттилэр. 

Куорат баһылыгын эбээһинэһин толорооччу саҥа оскуоланы тутар ордук тоҕоостооҕун бэлиэтээтэ.

«Экспертэр этиилэрин истэн баран, бу дьиэҕэ бөҕөргөтөр, чөлүгэр түһэрэр үлэ кыаллыбат диэн түмүккэ кэллибит. Билигин оҕолор үөрэнэллэригэр эбии миэстэлэри таһаарарга “Метелица” клиникатын атыылаһар, ону таһынан эбии үөрэхтээһин эбийиэктэрин Горькай уулуссатын 98/1 нүөмэрдээх дьиэтигэр көһөрөр  туһунан боппуруоһу көрөбүт. Сотору кэминэн быһаарыахпыт», – диэтэ Евгений Николаевич.

Төрөппүт кэмитиэтэ куорат салалтатыгар махтанна.

«Өрөспүүбүлүкэбит Бырабыыталыстыбата биһигини уонна куорат дьаһалтатын өйүө диэн эрэнэбит», – диэтилэр.