1 №-дээх оскуола тутуута тэтимнээхтик саҕаламмыт

Ленин проспегар тутуллар 250 миэстэлээх 1 №-дээх оскуола бастакы сыбаайата бу саас муус устар 27 күнүгэр Өрөспүүбүлүкэ күнүгэр үөрүүлээх быһыыга-майгыга саайыллыбыта.
Бэлиэтээн эттэххэ, оскуола Арассыыйа бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев сорудаҕынан тутуллар. Тутууну «СӨ судаарыстыбаннай сакаасчыт сулууспата» ГКУ ыытар.
Бу күннэргэ куорат баһылыга Евгений Григорьев тутуу балаһааккатыгар сылдьан, балтараа эрэ ый иһигэр элбэх үлэ ыытыллыбытын бэлиэтээтэ. Евгений Григорьев санатарынан, Дьокуускай куоракка бүгүҥү күҥҥэ 2030 сылга диэри олоххо киириэхтээх маастар-былаан 90 бырайыагыттан 33-һэ саҕаламмыт. Оттон 1№-дээх оскуола 2025 сыл күһүнүгэр номнуо үлэҕэ киириэхтээх.