1-8 кылаастарга дистанционнай үөрэх уһатылынна

Саха сиригэр оҕолор ортолоругар грипп уонна ОРВИ ыарыылар намтаабаттар. Онон сибээстээн, ахсынньы 7-12 күннэригэр санитарнай-эпидемиологическэй хамыыһыйа быһаарыытынан киин куоракка үөрэх тэрилтэлэрин 1-8 кылаастарыгар дистанционнай үөрэх уһатылынна. Итини сэргэ куруһуоктар, секциялар, эбии дьарыктар уонна да атын үөрэх таһынааҕы тэрээһиннэр тохтотулуннулар. Ити туһунан куорат баһылыгын социальнай боппуруостарга солбуйааччы Наталья Степанова санитарнай-эпидемиологическэй хамыыһыйа мунньаҕар иһитиннэрбит. 
Наталья Степанова информациятынан, үөрэх уонна иитии дистанционнай технология көмөтүнэн ыытыллар. Хааччахтааһын кэмигэр тэрилтэ үлэһиттэрэ дезинфекциялыыр сириэстибэлэринэн туттан генеральнай убуоркалары оҥоруохтара. Төрөппүттэр ортолоругар оҕолору кытта элбэх киһи тоҕуоруһар сирдэригэр – киинэ театрдарыгар, спорт саалаларыгар, атыы кииннэригэр уонна кафеларга, остолобуойдарга сылдьалларын аҕыйаталларын курдук сэрэтэр үлэ салҕанар. 
Хааччахтааһын кэмигэр Дьокуускай территориятыгар өрөспүүбүлүкэ уонна куорат таһымнаах бары спортивнай, культурнай-маассабай тэрээһиннэр тохтууллар.