Ыалдьыбыт киһи ахсаана 9 буолла
Ил Дархан Айсен Николаев бүгүҥҥү брифинигэр иһитиннэрбитинэн, Дьокуускайга коронавируһунан ыалдьыбыт киһиттэн 6–та үтүөрэн дьиэтигэр таҕыста. 9 киһи үтүөрэргэ бардылар, туруктара үчүгэй. Эрдэ Нидерландыттан кэлэн, бэйэтэ дьаһанан “самоизоляцияҕа” олорбут, Саха сирин олохтооҕо анаалыһа “положительнай” буолла. Анаалыһын салҕыы Новосибирскайга “Вектор” лабораторияҕа бэрэбиэркэҕэ ыыттылар. Бу киһи алтыспыт дьоно бары бэрэбиэркэни аастылар.
Муус устар 1 күнүттэн тас дойдуттан кэлбит дьону тута обсерваторга киллэрэллэр. Оттон Арассыыйа атын регионнарыттан кэлбит дьон “самоизоляцияҕа” бэйэлэрэ барыахтаахтар.
Оскуолаларга ыраахтаан үөрэнии ньымата киирдэ, төрдүс чиэппэр саҕаланна. Саха сирин 10 бырыһыана интэриниэт сибээһэ мөлтөх эбэтэр букатын суох. Оннук нэһилиэктэргэ учууталлар сорудах тарҕатыахтара биитэр кыра бөлөхтөрүнэн (12 киһиттэн элбэҕэ суох мустан) үөрэниэхтэрэ.
МФЦ үлэлээтэ. Ол эрэн билигин МФЦ электроннайынан оҥоһуллубат эрэ өҥөлөрү, эрдэ суруттаран уочараттааһын бэрээдэгинэн оҥорор. Электроннайынан оҥоһуллар өҥөлөрү биири да толорбот.
Ил Дархан быһа сибээскэ таҕыстаҕын аайы дьон аэропорду сабарыгар көрдөһөллөр. Арассыыйа регионнарыгар ыалдьыбыт киһи ахсаана эбиллэ турар. Ол эрэн биир да регион халлаан суолун саба илик. Бөдөҥ авиахампаанньалар рейстэрин аччаттылар.
Сонуннар
Ордук ааҕаллар
