29.04.2022 | 19:00

Уунан хааччыйыы уонна гаастааһын кыаллар дуо?

Уунан хааччыйыы уонна гаастааһын кыаллар дуо?
Ааптар: Айыына ДОНСКАЯ
Бөлөххө киир

Муус устар 22 күнүгэр Дьокуускай куорат Дууматын Куорат кытыытынааҕы территориялары уонна агропромышленнай комплексы сайыннарыыга сис хамыыһыйатыгар «Дьокуускай куорат уокуругун агропояһын 2020-2024 сылларга сайыннарыы» муниципальнай бырагыраама 2021 сыллааҕы түмүктэрин истии буолла.

Тыа хаһаайыстыбатын управлениетын салайааччыта Марат Данилов иһитиннэрбитинэн, былырыын бырагыраамаҕа 217 084,1 тыһ. солк. көрүллүбүт.

Марат Данилов хос бырагыраамалары үбүлээһин, хаһаайыстыбаларга, сылгы баазатын тутууга уонна технологическай хааччыйыыга, сүөһү, сибиинньэ иитэр комплекстарга, үүнээйи үүннэриитин сайыннарыыга, агропрофилированнай оскуолалары өйөөһүҥҥэ субсидиялааһын туһунан сиһилии кэпсээтэ.

Кини 2022 сыллааҕы былааны уонна хас биирдии хайысханан үбү тыырыыны кытта билиһиннэрдэ. Ол курдук, агропояһы сайыннарыыга быйыл 238 349,3 тыһ. солк. көрүллүбүт.

Тыа хаһаайыстыбатын управлениетын салайааччыта ынах сүөһү ахсаана элбээбитин бэлиэтээтэ. «Котрус» ГКФХ ИП баазатыгар сиэмэнэн дьарыктанар хаһаайыстыбаны тэрийии былааннанар. Итиннэ Тюмень куораттан 60 туонна элитнэй сиэмэ хортуоппуйа атыылаһыллыахтаах эбит.

Итини кытта хамыыһыйаҕа нүөлсүтүү үлэтин, күөллэри толорууну, сайыҥҥы уу ситимин холбооһуну уонна федеральнай бырагыраамаҕа кыттыыны дьүүллэстилэр.

Чуолаан Тулагыга сайыҥҥы уу ситимин тутууну дьүүллэстилэр; былаан олоххо киирдэҕинэ, сайыҥҥы өттүгэр нэһилиэк дьиэлэрин 77%-на уунан хааччыллар кыахтаах. 

Сис хамыыһыйа бэрэссэдээтэлэ Парасковья Козлова сайыҥҥы уу ситимин тардыы — куорат кытыытын сүрүн кыһалҕата диэн туран, нэһилиэктэри барытын федеральнай бырагыраамаҕа киллэрэр кыах баарын-суоҕун чуолкайдаста.

Марат Данилов быһаарбытынан, куорат уокуруга сайыҥҥы уу ситимин тардыыга федеральнай бырагыраамаҕа киирэр кыаҕа суох. Ол эрээри өрөспүүбүлүкэтээҕи Тыа хаһаайыстыбатын министиэристибэтигэр куорат уокуругар туспа хос бырагырааманы оҥорор туһунан этии киллэриллибит.

Олохтоох дьаһалта Олох-дьаһах хомунаалынай хаһаайыстыбатыгар уонна энергетикаҕа департаменын начаалынньыгын солбуйааччы Светлана Жуллярова Табаҕа сэлиэнньэтигэр канализация тутуутун туһунан иһитиннэрдэ. Тутуу бырайыактаммыт кыамтата — сууккаҕа 1200м3/.

Кангалааска баар станция эргэрбит, онон сууккаҕа 800м3 кыамталаах саҥа канализация тутуллара ирдэнэр. Итини кытта бырайыакка кыбаартал иһигэр баар уу ситимин саҥардан оҥоруу көрүллүөхтээх.

Светлана Жуллярова итиэннэ Маҕан сэлиэнньэтигэр ууну ыраастыыр станцияны уонна кииннэммит уу ситимин тутуу варианнарын уонна Табаҕа, Кангалаас, Хатас, Тулагы сэлиэнньэлэрин уунан хаачыйыыга туһуламмыт тэрээһиннэри кытта билиһиннэрдэ. 

«Севернай” микрооройуон элбэх оҕолоох ыалларыгар бэриллибит сир учаастактарыгар гаас ситимин уопсай уһуна 30 км тэҥнэһэр. Билигин итиннэ суол каартатын дьүөрэлиир үлэтэ ыытыллар.

Хатас элбэх оҕолоох ыалларыгар бэриллибит сир учаастактарыгар үс кыбаарталы гаастааһын былааннанар, ити быһыллыбыт 945 учаастактан быһа холоон 200-тэ. 2020 сыллаахха, сорох учаастактар ууга барар зонаҕа түбэһэллэрин иһин, хааччахтааһын киллэриллибит. 

Куораты тутуу уонна тырааныспар инфраструктуратын департаменын начаалынньыга Северина Архипова куорат кытыытын хас биирдии нэһилиэнньэлээх пуунугар социальнай эбийиэктэри, спортивнай балаһааккалары тутуу, тиэргэннэри тупсаран оҥоруу, суол хапытаалынай өрөмүөнүн уонна тутуутун туһунан иһитиннэрдэ.

Информациялары истэн баран, куорат таһынааҕы нэһилиэктэр дьаһалталарын исписэлиистэрэ ууга барар зоналар, биэрэги бөҕөргөтүү, суол өрөмүөнүн, спортивнай балаһааккалары тутуу тустарынан ыйыталастылар.

Сүнньүнэн, Парасковья Козлова бэлиэтээбитинэн, куорат кытыытын инфраструктуратын сайыннарыыга уонна тупсаран оҥорууга быйыл улахан үлэ ыытыллыахтаах

Сонуннар

Ордук ааҕаллар

Дьоҕур-талаан арыллыыта
Спорт | 26.01.2023 | 18:00
Дьоҕур-талаан арыллыыта
Дьиҥинэн, Орто дойдуга кэлбит киһи барыта туохха эрэ дьоҕурдаах, талааннаах. Дьэ, ол арыллара, туттуллара дэбигис кыаллыбат. Ону үрдүк үөһээ айыыларбыт бэйэлэрэ быһааран эрдэхтэрэ. Биллэн турар, улаханнык сыраластахха, күнү-дьылы бараатахха, сүрэхтээх-бэлэстээх, туруу үлэһит, айылҕаттан айдарыылаах буоллахха эрэ дьоҕур, талаан кэлиэн сөп. Дьөгүөр Картузов, дьэ, кырдьык, айылҕаттан хатаҕаламмыт киһи. Тыа киһитин сиэринэн...
Сардаана Токоемова:  «Иистэн дуоһуйууну ылабын...»
Дьон | 28.01.2023 | 16:00
Сардаана Токоемова: «Иистэн дуоһуйууну ылабын...»
Иис сахаларга урут-уруккуттан хааммытыгар баар. Билигин биһиги ортобутугар талааннаах иистэнньэҥнэр, норуот маастардара аҕыйаҕа суохтар. Кустуктуу субуллар оһуор быысапкалары, сахалыы тыынынан илгийэр кылтан, сиэлтэн оҥоһуктары, туостан көбүөрдэри, сэлээппэлэри, халадаай былаачыйалары, оноолоох соннору, хаһыаччыктары о.д.а. саха дьахталлара ис сүрэхтэриттэн тигэллэр. Бу тигиилэргэ төһөлөөх дууһа сылааһа ууруллубута буолуой диэн киһи сөҕө эрэ саныыр....
«Прометей» оскуолатыгар сахалыы иитиини туруорсар төрөппүт кэккэтэ кэҥиир
Куорат олоҕо | 01.02.2023 | 17:00
«Прометей» оскуолатыгар сахалыы иитиини туруорсар төрөппүт кэккэтэ кэҥиир
Дьокуускай куорат историятыгар аан бастаан 990 миэстэлээх улахан оскуола аны күһүн үлэҕэ киириэхтээх.  990 миэстэ диэн бырайыактаммытынан уйунар кыаҕа буоларын өйдүөххэ наада. Киин куораппытыгар миэстэ тиийбэт кыһалҕата баарын тухары оскуолаларбыт 2-3 төгүл ноҕоруускалаах, иккилии симиэнэнэн үлэлии олоруохтара турдаҕа. Онон бу саҥа оскуолаҕа балтараа тыһыынчаҕа тиийэ оҕо үөрэнэрэ буолуо диэн барыллаан...
Көмө мүнүүтэ да тохтообот
Дьон | 03.02.2023 | 12:00
Көмө мүнүүтэ да тохтообот
Аҕа дойду Улуу сэриитин кэмигэр Саха сирин дьоно-сэргэтэ төһө да тыһыынчанан килэмиэтиринэн ыраах олордоллор, өйдөрө-санаалара Кыайыы эрэ туһугар сытара. Биир дойдулаахтарбыт харчынан, облигациянан, үрүҥ көмүһүнэн, кыһыл көмүһүнэн, балыгынан, күндү түүлээҕинэн о.д.а. көмөнү хара көлөһүннэрин тоҕон туран фроҥҥа ыыппыттара. Ийэлэрбит, эбэлэрбит ыарахан үлэлэрин быыһыгар төһөлөөх кээнчэни, үтүлүгү тигэн ыыппыттарай! Дэлэҕэ сэрии...