Тоҕо устудьуоннар күннэрин Татьяна күнэ диэн ааттыылларый?

1755 сыллаахха тохсунньу 25 чыыһылатыгар  — Сибэтиэй Татьяна күнүгэр (саҥа истиилиниэн) императрица Елизавета Петровна Москваҕа университет тэриллэрин туһунан ыйааҕа тахсар. Онтон ыла тохсунньу 25 күнэ устудьуон аймах бырааһынньыгынан биллэр уонна Татьяна күнэ диэн ааттанар.

Хас биирдии университекка, институкка, академияҕа устудьуон күнүн бэйэлэрин үгэстэринэн бэлиэтииллэр. Устудьуоннар араас тэрээһиннэргэ, куонкурустарга кытталлар, сессия бүтүүтүгэр, саҥа семестр саҕаланыытыгар үөрэллэр. Бу күҥҥэ үрдүк/орто үөрэх кыһаларыгар ааспыт сыл иһигэр улахан ситиһиилээх устудьуоннары наҕараадалыыллар, түмүктэри таһаараллар. Ону таһынан кэнсиэр, дьаарбаҥка, спортивнай күрэхтэһиилэр ааһаллар.

Холобур, Волгоград куоракка бу күн сыл аайы араас Татьяналар мэтириэттэрин быыстапката ыытыллар, оттон Белгородтааҕы техническэй университекка былыргылыы истииллээх баал тэриллэр.

Ол гынан баран бу күнү саамай далааһыннаахтык, биллэн турар, М.В. Ломоносов аатынан Москватааҕы судаарыстыбаннай университекка (МГУ)  бэлиэтииллэр. МГУ биир ураты уонна былыргы үгэһинэн бырааһынньык буолуо 40 хонук иннинэ таҥара дьиэтин ырысыабынан медовуха буһараллара уонна тохсунньу 25 күнүгэр ректор бу утаҕынан устудьуоннары күндүлүүрэ буолар.

Биллэн турар, бу күн бары Татьяна диэн ааттаах кыргыттары эҕэрдэлииллэр. Өскөтүн билэр кыыскыт Татьяна, эбиитин устудьуон буоллаҕына, хайаан да эҕэрдэлээҥ.

Татьяна күнүн билгэтэ

Биллэн турар, үксэ үөрэххэ ситиһиилэри кытта ситимнээх. Олортон сорохторо маннык:

Түннүгү аһан баран, зачеткалаах илиигин быктаран, үс төгүл: “Халява, кэл”,— диэн хаһыытаа. Бу кэмҥэ уулуссаҕа ааһан иһээччилэр: “Хайыы үйэ айаннаан иһэр!"—диэн хоруйдаатахтарына, бу үөрэх дьыла этэҥҥэ ааһыаҕа.

Тохсунньу 25 күнүгэр куорат саамай үрдүк сиригэр тахсан, баҕа санааҕын искэр саҥар, оччоҕуна баҕарбытыҥ хайаан да туолуо.

Дьокуускай устудьуоннара үөрэнэр куорпустарын аттыгар “алгыстаах алаадьы” уураллар, ол сессияҕа көмөлөһөр үһү.