Талааннаах кыргыттар куонкурустара биллэрилиннэ

Алтынньы 11 күнэ – Аан дойдутааҕы кыргыттар күннэрэ. Бу нэдиэлэҕэ киин куорат оскуолаларын 5 - 11 кылааһын кыргыттара, «Арассыыйа ийэлэрэ» Бүтүн Арассыыйатааҕы хамсааһын регионнааҕы салаата уонна Ф.И. Авдеева аатынан Оҕо айымньытын дыбарыаһа тэрийэр куонкурустарын сүүмэрдээһинигэр кыттан, талааннарын киэҥ эйгэҕэ таһаарыахтарын сөп.  

Куонкурус сэттэ номинациялаах:

- «Шаг в науку» номинация чинчийэр үлэҕэ, бырайыак оҥоруутугар үрдүк ситиһиилэрдээх, итиэннэ научнай-практическай конференцияларга бэлиэтэммит үлэлээх оҕоҕо бэриллэр;

- «Добрая воля» номинация социальнай, аһымал тэрээһиннэргэ кыттар (көҕүлүүр), социальнай хайысханан үлэлэһэр кыргыттарга ананар;

- «Золотая кисть» номинация айар тэрээһиннэр көхтөөх кыттааччыларыгар, айар бэстибээллэргэ уонна куонкурустарга үрдүк ситиһиилэрдээх литературнай уонна уус-уран хайысхалаах үлэлэр ааптардарыгар туттарыллар;

- «Спортсменка года» номинацияҕа өрөспүүбүлүкэтээҕи, Бүтүн Арассыыйатааҕы, норуоттар икки ардыларынааҕы спортивнай күрэхтэһиилэр кыайыылаахтара тиксэр;

- «Волшебная нота» номинация хаһаайкатынан вокальнай искусство өрөспүүбүлүкэтээҕи, Бүтүн Арассыыйатааҕы, норуоттар икки ардыларынааҕы куонкурустарын, бэстибээллэрин кыайыылааҕа буолар;

- «Мир моих увлечений» номинация өрөспүүбүлүкэтээҕи, Бүтүн Арассыыйатааҕы, норуоттар икки ардыларынааҕы куонкурустарга уонна бэстибээллэргэ ситиһиилэрдээх доруобуйатыгар хааччахтаах оҕоҕо бэриллэр;

- «Юная мастерица» номинацияҕа прикладной айымньы өрөспүүбүлүкэтээҕи, Бүтүн Арассыыйатааҕы, норуоттар икки ардыларынааҕы куонкурустарга уонна бэстибээллэргэ призердаабыт, норуот үгэстэрин үйэтитиигэ көхтөөхтүк кыттар кыыс тиксэр.

Куонкуруска кыттааччылар сайаапкаларын 2023 сыл алтынньы 8 күнүгэр диэри биэрэллэр, түмүк алтынньы 11 күнүгэр тахсар. Кыайыылаахтар дипломнарынан уонна сыаналаах бириистэринэн наҕараадаланыахтара.

Үлэлэри электроннай көрүҥүнэн официальнай почтаҕа – konkyrs_ddt@mail.ru 2023 сыл алтынньы 8 күнүгэр диэри (ити күнү киллэрэн туран) «Кыргыттар номинациялара» бэлиэтээһиннээх күүтэллэр. Билсэр төлөпүөн: 707-061.