Сымыйа сураҕы тарҕатыы иһин холуобунай эппиэтинэс

Госдуума сымыйа сураҕы тарҕатыы иһин эппиэтинэскэ тардыы сокуонун ылынна. Онон бассаапка сэрэхтээх буоллахха табыллар.

Ыксаллаах быһыы-майгы кэмигэр бэрээдэги кэһии, ыарыыны тарҕатыы иһин административнай ыстараап киирдэ:

• Физическэй сирэйтэн 40 тыһ. солк. диэри; ИП-ларга – 150 тыһ. солк.; юридическэй сирэйгэ – 500 тыһ. солк. диэри (холобур, тэрилтэ үлэһиттэрин коронавирустан харыстыыр ньымалары ылымматах буоллаҕына).
• Бэрээдэги кэһии киһи өлүүтүгэр тиэрдибит буоллаҕына – физическэй сирэйтэн 300 тыһ. солк. диэри; ИП-лартан уонна юридическэй сирэйтэн 1 мөл. солк. диэри.
• Сымыйа сураҕы тарҕатыы иһин юрид.сирэйтэн – 3 мөл. солк. диэри.
• Сымыйа сураҕы тарҕатыы дьон өлүүтүн, уопсастыбаннай бэрээдэк кэһиллиитин аҕалбыт буоллаҕына, юридическэй сирэйтэн – 5 мөл.солк. диэри.

Физическэй сирэйтэн, ол аата хас биирдии боруостуой киһиттэн, коронавирус туһунан сымыйа сураҕы тарҕатыы  холуобунай эппиэтинэһэ – 700 тыһ. солк. саҕалаан 3 сылга диэри хаайыы буолуон сөп.

Сымыйа сурах содулунан дьон доруобуйата эмсэҕэлээбит буоллаҕына – 1,5 мөл. солк. саҕалаан 3 сылга диэри хаайыы; киһи өлүүтэ таҕыстаҕына – 2 мөл. солк ыстырааптан саҕалаан 5 сылга диэри хаайыы.

Санитарнай-эпидемиологическай быраабыланы кэһии ыарыыны тарҕаттаҕына – 700 тыһ. солк. ыстырааптан саҕалаан 2 сылга диэри хаайыы буолуон сөп. Быраабыланы кэһии түмүгэр дьон өллөҕүнэ – 2 мөл. солк. ыстыраап эбэтэр 7 сыл хаайыы. Холобур, кыраныысса таһыттан кэлбит киһи  карантиҥҥа олорбокко, атын дьоҥҥо ыарыыны тарҕаппыт буоллаҕына, хаайыыга барыан сөп буолла.