Свердлов уулуссатыгар – саҥа тротуардар уонна көҕөрдүү

Куорат дьаһалтатын пресс-сулууспата иһитиннэрэринэн, быйыл, 2021 сылга, Свердлов уулуссатын 34/1 №-дээх дьиэтин аттыгар саҥа тротуардар оҥоһуллуохтара уонна «Куттала суох, хаачыстыбалаах суоллар” национальнай бырайыак чэрчитинэн суол кытыытыгар көҕөрдүү үлэтэ барыаҕа.
2020 сыллаахха бэдэрээтчитинэн «Алаас» хампаанньа анаммыта уонна суол болотунатын уонна тротуар бүрүөһүнүн саҥардар үлэни ыыппыта. Ол эрэн тутуу сезона бүтэ илигинэ уулусса өрөмүөнүн хантараага көтүрүллүбүтэ. 

«Биричиинэтэ – хантараак эбэһээтэлистибэлэрэ болдьоммут кэмигэр уонна суол быраабылатыгар эппиэттиир биир кэлим үлэлэр туолбатахтара буолар. Итэҕэс биэдэмэһэ быйыл олунньу ыйга оҥоһуллубута», - диэн кэпсиир «Главстрой» МХТ суол тутуутугар салаатын кылаабынай специалиһа Денис Стецюк. 
«Алаас» хампаанньа ыыппыт үлэлэрэ мэктиэлээхтэр уонна бэдэрээтчит суотугар оҥоһуллаллар.