Суолга бэрэбиэркэ күүһүрдэ

Саха сирин суолларыгар муус устар 4-14 күннэригэр ГИБДД сулууспалара бэрэбиэркэни күүһүртүлэр. Ол курдук, патруллуур сулууспа нэрээтэ элбээтэ, куорат уонна федеральнай суолларга суоппардары уонна тырааныспары бэрэбиэркэлииллэр. 
Итинник күүһүрдүллүбүт бэрэбиэркэ тактикатынан талыллыбыт учаастакка хас биирдии массыынаны тохтотоллор. Эриэйдэлэр сүрүн сыаллара – пассажирдары уонна сэрэхтээх таһаҕаһы таһар итирик уонна массыынаны ыытар бырааба суох суоппардары тутуу. ГИБДД сулууспата иһитиннэрбитинэн, ааспыт өрөбүллэргэ өрөспүүбүлүкэ суолларыгар 5 массыына саахала регистрацияламмыт, онтон түөрдэ киһи өлүүлээх, аҕыс киһи араас степеннээх эчэйиини ылбыттар. 
Барыта 1218 административнай боротокуол оҥоһуллубут, 41 итирик туруктаах суоппар тутуллубут, 9 киһи уруулга хаһыс да төгүлүн итирик олорбут, 48 киһи тырааныспары ыытар бырааба суох сылдьыбыт.
ГИБДД гражданнарга туһаайан итирик туруктаах суоппардары көрдөххүтүнэ маннык төлөпүөннэринэн биллэрэргитигэр көрдөһөр: 127, 35-22-22, 102. Суолга сэрэхтээх буолуҥ!