«Спортивнай» түөлбэ бастакы дьиэтин тутуу саҕаланна

Атырдьах ыйын 28 күнүгэр 17-с кыбаарталга тутуллар «Спортивнай» түөлбэҕэ маҥнайгы 12 этээстээх дьиэ акылаатын бастакы сыбаайата түстэ.
Бэлиэ тэрээһиҥҥэ бырабыыталыстыба бэрэссэдээтэлин бастакы солбуйааччыта Кирилл Бычков, куорат баһылыга Евгений Григорьев, дьокутааттар, Строительнай уокурук олохтоохторо о.д.а. кыттыыны ыллылар.
Тутуу эппиэттээх операторынан Владимир Трегубов генеральнай дириэктэрдээх  Өрөспүүбүлэкэтээҕи ипотека агентствота буолар. 

Тыл этээччилэр бэлиэтээбиттэринэн, 2025 сыл бүтүүтүгэр манна 207 ыал хаарбах дьиэттэн көһөн киириэҕэ. Ол курдук, быйыл 11 хаарбах дьиэ олохтоохторо көһөрүллэллэр. Оттон кыбаартал 161 хаарбах дьиэтин олохтоохторо 2032 сылга диэри бары көһөрүллэн бүтүөхтэрэ. 
Бэлиэтээн эттэххэ, «Спортивнай» түөлбэ федеральнай бүддьүөт суотугар Арассыыйа бэрэсидьиэнэ Владимир Путин ыйааҕынан Уһук Илин куораттарын сайыннарыыга кирэдьиит суотугар тутуллар. Ол эбэтэр «2», «4» уонна «17» кыбаарталтан уопсайа 161 дьиэ көтүрүллэн, кинилэр оннугар 46 элбэх этээстээх дьиэ, икки уһуйаан, икки уопсай үөрэхтээһин оскуолата, элбэх функциялаах спорт комплекса тутуллуохтара. Онон «Спортивнай» түөлбэҕэ 18 тыһыынча киһи дьиэлэниэҕэ.