Спорт саалата суох оскуолаларга арочнай саала тутуллар

Дьокуускай куорат 20 №-дээх оскуолата саҥа үөрэх дьылын үөрэнээччилэригэр дьоһун бэлэхтээх көрсөөрү бэлэмнэнэр. Ол курдук, куорат баһылыгын солбуйааччы Антон Алексеенко иһитиннэрбитинэн, оскуола тиэргэнигэр саҥа арочнай спорт саалата тутуллан эрэр.
Бэлиэтээн эттэххэ, куорат 20 №-дээх оскуолата былыргы интэринээт дьиэтигэр олорор буолан, спорт саалата төрдүттэн суох. Онон бу сыллар тухары оҕолор физкултуура уруоктарыгар чугастыы «Модун» уонна «Дохсун» спорт комплекстарыгар дьарыктанан кэллилэр. Быйыл дьэ федеральнай бүддьүөттэн харчы көрүллэн, манна уонна куорат өссө биир бу курдук кыһалҕалаах оскуолатыгар - 10 №-дээх оскуолаҕа - арочной спорт саалалара тутуллаллар. Бырайыак быһыытынан манна таҥас уларыттар хостор, душ уонна 12 м кэтиттээх, 48 м усталаах дьарыктанар манеж баар буолуохтара.