Сонуннар

«ЯПАК» саҥа салайааччыланна

Дьокуускай куорат суолга управлениетын салайааччыта “ЯПАК” МУТ дириэктэрин дуоһунаһыгар куонкуруһу кыайда.

Куонкуруска Валерий Домотовтан ураты өссө аҕыс киһи кыттыбыта. Санатар буоллахха, бу тэрилтэни урут Сергей Максимов салайан кэлбитэ.

Дьиэлэри дезинфекциялааһын саҕаланна

Дьокуускай куоракка Салайар хампаанньалар элбэх киһи олорор дьиэлэригэр коронавируһу утары профилактическай тэрээһин быһыытынан санитарнай чэбдигирдиигэ киирдилэр.

Маныаха “Прометей” СХ Петровскай уулуссаҕа баар дьиэлэргэ үлэлээбитин хаартысканан уонна видеонан отчуоттаата.

“Олохтоохтор бэйэлэрин Салайар хампаанньаларыттан подъезтары дезифекциялыыры Роспотребнадзор ирдэбилинэн модьуйар бырааптаахтар. Куорат уокуругун быраабаларыгар бу боппуруоһу кытаанах хонтуруолга тута сылдьалларыгар сорудахтанна”, - диэн иһитиннэриигэ этиллэр.

Ыам ыйыгар диэри бэтэрээннэр босуобуйалара төлөнүө

50 уонна 75 тыһыынча солкуобай кээмэйдээх биир кэмнээҕи төлөбүр муус устар ыйы аһарбакка пенсионнай пуонда нөҥүө төлөнүөҕэ.

Төлөбүрү Аҕа дойду Улуу сэриитин бэтэрээннэрэ, инбэлииттэрэ, Ленинград блокадатын кыттыылаахтара, концлааҕыр оҕолоро, сэрии огдооболоро, тыыл бэтэрээннэрэ ылыахтара.

Саха сиригэр биир кэмнээҕи төлөбүрү 5000 бэтэрээн тутуохтаах.

Ийэ хапытаалыгар саҥа уларыйыылар

Пенсионнай пуонда Саха сиринээҕи салаата 2019 сыллааҕы үлэтин отчуоттуур киэҥ ыҥырыылаах мунньаҕа ыытылынна.

Отчуоту таһынан 2020 сыллаах үлэ былаанын, биэнсийэ сокуонугар туох уларыйыылар киирбиттэрин туһунан кэпсэтии барда. Пенсионнай пуондаҕа сүрүн уларыйыы ийэ хапытаалыгар киирдэ. Ол курдук, 35-с федеральнай сокуоҥҥа олоҕуран ийэ хапытаалын сертификатын дьиэ кэргэҥҥэ бастакы оҕо төрөөтөҕүнэ ылар кыахтанна. Сертификат кээмэйэ 466 тыһыынча 617 солкуобайга тэҥнэһэр. Оттон бу ыал иккис оҕолонноҕуна ийэ хапытаалын кээмэйэ өссө эбии 150 тыһыынча солкуобайынан улаатар. Өссө биир улахан уларыйыынан муус устар 15 күнүттэн сертификаты дьиэ кэргэҥҥэ оҕо төрөөтөҕүнэ ийэ өттүттэн сайабылыанньата суох анааһын буолар. Ол эбэтэр дьиэ кэргэҥҥэ оҕо төрөөтөҕүнэ пенсионнай пуонда тэрилтэлэрэ саахса тэрилтэтиттэн бу оҕо төрөөтө диэн иһитиннэриини быһаччы ыланнар, ийэҕэ сертификаты туох да сайабылыанньата суох аныыллар. Саҥа уларыйыыларынан ийэ хапытаалын бэриллиитэ 2026 сыл ахсынньы ыйга диэри уһаата.

Өрөспүүбүлүкэҕэ ас-үөл хааччылыыта тиийэр

Арассыыйа тыа хаһаайыстыбатыгар миниистирэ Арассыыйа бары регионнарыгар агропромышленнай комплекс салалтатын уорганнарыгар ас-үөл кээмэйин уонна атыы-эргиэн ситимигэр сыанатын кэтээн көрөллөрүгэр сорудахтаата.

Ону тэҥэ аччаабыта икки ыйга тиийэр ас-үөл саппааһын хаһааналларыгар ирдээтэ. Маныаха биэдэмистибэҕэ анал суһал штаб үлэлиир, өрөспүүбүлүкэ бу чааһыгар бүгүҥҥү күҥҥэ ыксаллаах быһыы-майгы суох, ас-үөл хааччыллыыта тиийэр диэн бэлиэтиир.

“Доҕордоһуу” катокка быыстапка турда

Кулун тутар 16 күнүттэн Ленин болуоссатыгар түстэммит “Доҕордоһуу” катокка аан бастакытын “Саха сирин

Национальнай художественнай музейын кыһыл көмүс коллекцията” бырайыак бастакы түһүмэҕин быыстапкатын туруордулар.

Куорат олохтоохторо худуоһунньуктар Михаил Лукин, Афанасий Осипов, Наум Засимов уонна Мария Магатырова үлэлэрин кытта билсиэхтэрэ.

Өрүһүнэн сырыы уйуга аччыыр

Саха сиригэр айан уйугун туонната мууһунан туоруур сирдэргэ түһүмэҕинэн аччаан иһиэ диэн ЫБММ пресс-сулууспата иһитиннэрэр.

Кулун тутар 26 күнүттэн федеральнай хайысхалаах Дьокуускай – Аллараа Бэстээх уонна Хаандыга – Мэҥэ-Алдан Өлүөнэ уонна Алдан өрүстэри туоруурга 30 туоннаҕа диэри намтатар былааннаахтар.

Муус устар 1 күнүттэн Бүлүү өрүскэ, Бүлүү бөлөх оройуоннарыгар эмиэ 30 туоннаҕа диэри түһэриэхтэрэ. Маны таһынан бу кэмтэн Хатас – Павловскай, Кангалаас – Суотту хайысханан сырыы уйуга эмиэ намтыа.

Маныаха суолу сабыы болдьоҕо муус уйугуттан уонна күн-дьыл туругуттан олохтонуо диэн пресс-сулууспа бэлиэтээн этэр.

Арыгынан эргиммит диспетчер тутулунна

Хаҥалас улууһун Покровскай куоратыгар сокуону кэһэн туран арыгынан эргинэ олорор киһи тутулунна диэн ИДьМ пресс-сулууспата иһитиннэрэр.

“Куорат такситын сулууспатын 54 саастаах диспетчерэ дьахтар, үлэтин миэстэтигэр оройуон олохтоохторугар арыгы атыылыы олорбута биллибит. Полиция үлэһиттэрэ 26 лиитэрэ аһыы утаҕы булбуттар”, - диэн этиллэр.

Киниэхэ административнай боротокуол толорулунна уонна 30 – 50 тыһыынчаҕа диэри бородууксуйатын тутан туран ыстараап түһэриллэр.

Кыайыы көтөллөөх кэллилэр

Бүлүү улууһун Кыһыл Сыыр бөһүөлэгин “Крайне Северные” КВН хамаандата Москваҕа тиийэн вице-чемпион буолан кэллэ.

Финалга Арассыыйа араас регионуттан түөрт саамай күүстээх хамаанда күөн көрсүбүт. Биһиги оҕолорбут Дагестан хамаандатын эрэ иннилэригэр угуннулар. Оҕолор “туйгун” сыанаҕа талааннарын көрдөрдүлэр, кэлбит дьон куттарын туттулар.

Дьүүллүүр сүбэҕэ биллиилээх артыыстар Пелагея, Эдгар Запашный уонна Дмитрий Хрусталев киирбиттэр. Артыыс уонна ыытааччы Дмитрий Хрусталев оҕолорго туһаайан улахан дьон КВН-гар киирэргит уолдьаспыт диэбитэ улахан сыанабыл буолбутун туоһулуур.

«Норуот бестселлерин» ааҕыҥ!

«Она+» хаһыат литературнай сыһыарыыта «Норуот бестселлерин» уочараттаах нүөмэрэ таҕыста. Бу нүөмэргэ Саха сирин биллиилээх суруйааччыта Владимир Федоров кэпсээннэрэ киирдилэр.

«Якутия медиа-холдинг» уонна «Она+» дьиэ кэргэн хаһыата бу сыл саҥатыттан уһулуччу бырайыагы олоххо киллэрэн, «Норуот бестселлерэ» диэн ааттаан, дьон-сэргэ болҕомтотун тартылар. Ый ахсын дьоҕус кээмэйдээх айымньы роман-хаһыат киэбинэн тахсан, ааҕааччылар болҕомтолорун өҥнөөх уруһуйунан, текст иһигэр баар иллюстрацияларынан тардар.

Хас биирдии ааптардар айымньылара төрүт үгэстэргэ төннөн, хатыламмат Сахабыт сирин биир кэлим сорҕотун быһыытынан ааҕааччы болҕомтотун тардаллар, сэҥээриитин ылаллар. Кистэл буолбатах, кэнники сылларга ордук оҕолор, оскуола үөрэнээччилэрэ кинигэни, уус-уран айымньылары аахпат буоллулар. Маныаха бу бырайыак хайа эмит өттүнэн көмөлөһөн, уран тылы сыаналааччылар кэккэлэрин хаҥатыыга туһалыаҕа диэн эрэнэбит.