Сайсары кытыла куоластааһыҥҥа бастаан иһэр

Киин куорат 5200-тэн тахса олохтооҕо https://14.gorodsreda.ru/ биир кэлим федеральнай платформаҕа 2023 сылга тупсарыллан оҥоһуллуохтаах уопсастыбаннай туоналар сүүмэрдээһиннэригэр куоластаата.  Куоластааһыҥҥа 2022 сыл муус устар 15 күнүттэн ыам ыйын 30 күнүгэр диэри 14 саастарын туолбут гражданнар кытталлар. Бу туһунан Олохтоох дьаһалта пресс-сулууспата иһитиннэрдэ.
Куоластааһыҥҥа киирбит 5 эбийиэктэн Сайсары кытылын уонна Ийэ скверин тупсаран оҥоруута инники кэккэҕэ сылдьаллар (3000 кэриҥэ куолас), иккис миэстэҕэ – Тимофей Сметанин «Лоокуут уонна Ньургуhун» айымньытын  матыыбынан тупсаран оҥоһуллуохтаах кытыл (900 кэриҥэ куолас), үһүскэ – Роман Михайлович Дмитриев аатынан кытылы тупсаран оҥоруу (800-тэн тахса куолас).
Гражданнар сөбүлээбит дизайн-бырайыактарын ыам ыйын 30 күнүгэр диэри «Судаарыстыбаннай өҥөлөр» нөҥүө тус кэбиниэттэригэр, эбэтэр https://14.gorodsreda.ru/ сайтка киирэн талыахтарын сөп.
Дьокуускай куорат кылаабынай архитектора Семен Сергеев бэлиэтээбитинэн, ханнык эбийиэк сотору кэминэн тупсарыллан оҥоһулларын туһунан быһаарыы ылыллара олохтоохтортон тутулуктаах.  
«Ол иһин куорат олохтоохторун рейтинговай куоластааһын сайтыгар киирэн дизайн-бырайыактары кытта билсэллэригэр уонна сөбүлээбиттэрин талалларыгар ыҥырабын», – диир олохтоохторго туһаайан Семен Сергеев.