Сардана Авксентьева оҕо сайыҥҥы сынньалаҥын толкуйдуурга ыҥырда
Куорат баһылыга Сардана Авксентьева Дьокуускай куорат Дууматын дьокутааттарын кытта сессия иннинээҕи көрсүһүүтүгэр оҕо сайыҥҥы сынньалаҥын хайдах тэрийэри толкуйдуулларыгар этии киллэрдэ.
“Биһиги маннык хааччахтаах ураты быһыыга-майгыга аан бастакыбытын түбэстибит. Ордук оҕолортон долгуйабыт, кинилэр биир дьиэҕэ хаайтаран олорон тэһийбэттэрэ биллэр. Сынньалаҥ лааҕырдара бастакы сменаҕа үлэлииллэрэ саарбах, ону тэҥэ үгэскэ кубулуйбут сайыҥҥы оскуолалар эмиэ үлэлээбэттэр. Онон биһиги хайдах гынан, тугу тобулан оҕолор сынньалаҥнарын уонна доруобуйаларын тупсарыыны ханнык усулуобуйаҕа куттала суох тэрийэрбитин бары толкуйдуохпутун наада”, - диэн Авксентьева дьокутааттарга эттэ.
Гордуума бэрэссэдээтэлин бастакы солбуйааччыта Евдокия Евсикова бу боппуруоһу Гордуума социальнай политикаҕа бастайааннай хамыыһыйатын мунньаҕар көрөргө этии киллэрдэ. Баһылык этиититтэн биир көрүҥүнэн чэпчэтиинэн туһанар оҕолор төрөппүттэригэр харчынан төлөбүр оҥоруохха сөп диэтилэр.
Сонуннар
Ордук ааҕаллар
