Саха кыыһа "Россия" ханаал күрэҕэр кыттар

Саха сириттэн сылдьар этно-толорооччу Аэлита Ершова ахсынньы 13 күнүгэр «Россия» ханаалга «Синяя птица» оҕо талаанын куонкуруһугар кыттыаҕа. Бу туһунан ВГТРК пресс-сулууспата иһитиннэрэр.

15 саастаах саха кыыһа биллиилээх битбоксер Вахтангы кытта дуэтынан хомуска оонньуоҕа.

Аэлита СӨ култууратын туйгуна Марина Ильинична Сокольникова-Мохначевская салайыытынан сэттэ сааһыттан хомуска уһуйуллан Саха политехническэй лицей «Добун» норуодунай этнофольклорнай ансаамбылын солиһа. Кини Аан дойдутааҕы, Арассыыйатааҕы, өрөспүүбүлүкэтээҕи фестиваллар уонна куонкурустар кыайыылаахтара. Ону таһынан «Айархаан» хомус академиятыгар Саха сирин үтүөлээх артыыһа, виртуоз хомусчут Альбина Михайловна Дегтяреваҕа эбии дьарыктанар.

«Синяя птица» кэлэр таһаарыытыгар финалга тахсыы уонна биир мөлүйүөн солкуобайдаах сүрүн бириис иһин дойдубут бары муннугуттан кэлбит артыыстар күрэхтэһиэхтэрэ. Куонкурус жюритыгар Сергей Безруков, Николай Цискаридзе, Дима Билан, Денис Мацуев бааллар.

Биэрии ахсынньы 13 күнүгэр киэһэ 18.15 чаастан «Россия» ханаалга көстүөҕэ.