Роспотребнадзор коронавируһу утары быраабылалары сымнатта

Сэтинньи 15 күнүгэр Роспотребнадзор кылаабынай судаарыстыбаннай санитарнай бырааһын коронавирус дьаҥын утары быраабылалары сымнатар туһунан Уурааҕа таҕыста. Ол курдук, маассабай тэрээһиннэргэ саалалары 70 % диэри толорор көҥүллэннэ, ол эрэн бары QR-кодтаах буолуохтаахтар. Ол туһунан Парламент хаһыата иһитиннэрдэ.
Уураахха сабыылаах тутууларга ыытыллар маассабай тэрээһин туһунан этиллэр. Манна сылдьааччылар бары быһыыны ылбыттарын эбэтэр инники өттүгэр ыалдьа сылдьыбыттарын туоһулуур QR-кодтаах буолуохтаахтар. Ити ирдэбил итиннэ үлэлиир дьоҥҥо эмиэ сыһыаннаах. Өссө биир усулуобуйа – регион былаастара тэрээһин ыытарга көҥүлү биэриэхтээхтэр. Итинник быһаарыыны эпидемиологическай быһыыны-майгыны учуоттаан, регион кылаабынай санитарнай бырааһын кытта сүбэлэһэн баран ылыныллыахтаах. 
Итини сэргэ, эрдэ этиллибитинэн, коронавируһу кытта охсуһар Суһал штаб туһааннаах биэдэмистибэлэри кытта кафеларга, тырааныспарга уонна маҕаһыыннарга булгуччулаах QR-кодтары киллэрии туһунан сокуон бырайыагын бэлэмниир. Итинник миэрэ 2022 сыл бэс ыйыгар диэри үлэлиирэ былааннанар.  Итини сэргэ, Арассыыйа олохтоохторо олунньу 1 күнүгэр диэри ПЦР-тест түмүгүн көрдөрөллөр. Ити болдьох кэнниттэн анаалыс түмүгүн быһыыттан босхоломмуттар эрэ көрдөрөр буолаллар.