Ойууру харыстааҥ!

Сылын аайы хаар уулуннаҕына сир аайы былырыыҥҥы хаппыт оту уматыы саҕаланар. Сааскы кэмҥэ сүрүннээн өртөөһүнтэн ойуур баһаара саҕаланар, нэһилиэнньэлээх пууннарга уонна экэниэмикэ эбийиэктэригэр куттал үөскүүр. Бу туһунан экологическай хонтуруол судаарыстыбаннай кэмитиэтэ иһитиннэрдэ. 
Экология министиэристибэтэ санатар, РФ Бырабыыталыстыбатын 2007 сыл бэс ыйын 30 күнүнээҕи 417 №-дээх уурааҕын 12-с пуунугар суруллубут Ойуурга баһаартан сэрэхтээх буолуу быраабылаларыгар олоҕуран, ойуур таһынааҕы сирдэргэ хаппыт оту уматыы бобуллар! 
РФ КоАП 8.32 ыстатыйатын 2-с чааһыгар олоҕуран, хаппыт оту уматыы иһин гражданнарга үс тыһыынчаттан түөрт тыһыынча солкуобайга диэри административнай ыстараап, оттон дуоһунастаах сирэйдэргэ – 15 тыһыынчаттан 25 тыһыынча солкуобайга диэри; юридическай сирэйдэргэ – 150 тыһыынчаттан 250 тыһыынча солкуобайга диэри ыстараап көрүллэр. 
Итинник уматыы уонна ойуур баһаара тахсыбаттарын курдук Министиэристибэ суһал бөлөхтөрө тэриллэн үлэлииллэр, Маай бырааһынньыктарыгар патруллааһын элбиэҕэ. 
Экология министиэристибэтэ гражданнары ойуурга уонна ойуур таһынааҕы территорияларга баһаартан сэрэхтээх буолуу быраабылаларын тутуһалларыгар ыҥырар. 
Баһаар буолбутун эбэтэр буруо тахсарын көрдөххүтүнэ Саха сирин ойуурун хаһаайыстыбатын регионнааҕы диспетчерскэй сулууспатыгар суһаллык биллэриҥ: 8(4112) 44-74-76. Ойуур харыстабылын быһа линията: 8 (800) 100-94-00.