Оскуолалар хапытаалынай өрөмүөннэрэ саҕаланна

Дьокуускай куорат 11 оскуолатыгар хапытаалынай өрөмүөнү ыытарга муниципальнай хантыраактар түһэрсилиннилэр. Быйыл хапытаалынай өрөмүөн 10-с, 20-с, 21-с, 23-с, 27-с, 31-с, 33-с, 36-с №-дээх орто оскуолаларга, Саха политехническэй лицейга, Дьокуускай куораттааҕы национальнай гимназияҕа, Марха дьоҕус оройуонун 1-гы №-дээх оскуолатыгар ыытыллар.
Өрөмүөн үлэтэ сорох оскуолаларга муус устар 15 күнүттэн саҕаланна, хапытаалынай өрөмүөн 11 оскуолаҕа барытыгар 2022 сыл атырдьах ыйын ортотугар түмүктэниэхтээх.
«Главстрой» МХТ иһитиннэрбиттэринэн, ыам ыйын 4 күнүнээҕи туругунан, тутар-таҥар үлэ  10 оскуолаҕа саҕаланна – 10-с, 20-с, 21-с, 23-с, 27-с, 33-с, Дьокуускай куораттааҕы национальнай гимназияҕа, Саха политехническэй лицейга уонна Марха дьоҕус оройуонун 1-гы №-дээх оскуолатыгар. 36-с №-дээх орто оскуолаҕа өрөмүөн үлэтэ  үөрэх дьыла түмүктэннэҕинэ, ыам ыйын 15 күнүттэн саҕаланыаҕа. 
Бүгүҥҥү күҥҥэ үлэ бары көрүҥэ чопчуламмыт, үлэ кээмэйин «дефектнэй» дьүөрэлэһиитин уонна смета докумуоннарын  уларытыытын биэдэмэстэрэ  оҥоһуллар.
Хапытаалынай өрөмүөнү ыытарга 809 мөлүйүөн солкуобайтан тахса көрүллүбүт, итинтэн 720 мөлүйүөн солкуобайа – федеральнай, 89 мөлүйүөн солкуобайтан тахса суума – олохтоох бүддьүөттэртэн. 
«Главстрой» МХТ (муниципальнай сакаасчыт) бэлиэтээбиттэринэн, тутар-таҥар үлэ  кээмэйэ үрдэтиллиэхтээх, онон сибээстээн хантыраак сыаналара уларыйыахтаах.
Үөрэҕирии управлениетын информациятынан, үөрэх дистанционнай пуормаҕа көһөр буоллаҕына, 5-11 кылаастар чэпчэтиилээх категорияҕа хапсар үөрэнээччилэрэ  «сухой паегынан» хааччыллыахтара.