Олохтоох дьаһалтаҕа саҥа анааһыннар

Куорат баһылыга Евгений Григорьев куорат уопсай пленарнай мунньаҕар саҥа анааһыннар туһунан биллэрдэ. Ол курдук, «Автодорожнай уокурук Управата» МХТ салайааччытынан Николай Обоюков, оттон ити дуоһунаска үлэлээбит Александр Иванов «Куорат кытыытынааҕы теплосетевой хампаанньа» МУТ дириэктэринэн ананнылар. Бу туһунан Олохтоох дьаһалта пресс-сулууспата иһитиннэрдэ.

Обоюков Николай Сергеевич 2010 сыллаахха М.К. Аммосов аатынан Саха судаарыстыбаннай университетын «Финансы и кредит» салаатын «Экономист» квалификациялаах үөрэнэн бүтэрбит. Үлэтин уопсай ыстааһа – 10-тан тахса сыл.
Үлэтин 2010 сыллаахха экономист быһыытынан «Октан» ХЭТ саҕалаабыт, салгыы араас дуоһунастарга – сүрүннүүр исписэлиистэн саҕалаан «Сунтаар улууһа» МО Хонтуруоллуур-суоттуур палаататыгар баһылык көмөлөһөөччүтүгэр тиийэ,  «Сунтаар улууһа» МО «Спортка уонна ыччат политикатыгар салаата» МХТ,  «Кутана нэһилиэгэ» уонна «Сунтаар улууһа» МО дьаһалталарыгар үлэлээбит. 2014 сылга СӨ култуураҕа уонна духуобунай сайдыыга Министиэристибэтин кылаабынай исписэлииһинэн үлэтин саҕалаабыт,  2017 сылтан РФ Федеральнай мунньаҕын Сэбиэтин чилиэнин СӨ Ил Түмэн Судаарыстыбаннай мунньаҕын үлэтигэр көмөлөһөөччүтүнэн үлэлээбит. 2021 сылга «Автодорожнай уокурук Управата» МХТ салайааччытын уопсай боппуруостарга солбуйааччытынан анаммыт. 
2022 сыл кулун тутар 14 күнүттэн «Автодорожнай уокурук Управата» МХТ салайааччытынан ананна. 

Иванов Александр Александрович 2013 сыллаахха М.К. Аммосов аатынан Саха судаарыстыбаннай университетын «Юриспруденция» салаатын «Юрист» квалификациялаах  үөрэнэн бүтэрбит. Үлэтин уопсай ыстааһа – 10-тан тахса сыл.
Араас дуоһунастарга – идэтинэн «Олимпийскай резервэ оҕо анал оскуолата» МТ эбии үөрэхтээһинигэр, «Муниципальнай баайы-дуолу салайыы агентствота» МТ,  «Куорат хаһаайыстыбатын үлэлэтэр сулууспа» МХТ, «Теплоэнергия» МУТ үлэлээбит. 2019 сылга Промышленнай уокурук Управлениетын начаалынньыгынан анаммыт, 2021 сыллаахха Автодорожнай уокурук Управлениетын начаалынньыга буолбут. 
2022 сыл кулун тутар 14 күнүттэн «Куорат кытыытынааҕы теплосетевой хампаанньа» МУТ дириэктэринэн ананна.