Оҕуруот аһын олордооччуларга саҥа субсидия көрүллүөҕэ

«Развитие овощеводства и картофелеводства» саҥа федеральнай бырайыак чэрчитинэн субсидия бэриллэр буолуоҕа. Манан дьоҕус уонна орто предпринимателлэр, маны сэргэ, “самозанятайдар” уонна кэтэх хаһаайыстыбалаах дьон эмиэ туһаныахтарын сөп.

Ол курдук, судаарыстыба хортуоппуйу уонна да атын оҕуруот аһын олордуунан дьарыктанар оҥорон таһаарааччылары өйүүр миэрэлэри кэҥэтиэҕэ. Бу туһунан уураахха Арассыыйа бырабыыталыстыбатын бэрэссэдээтэлэ Михаил Мишустин илии баттаата.

Субсидия агротехнологическай үлэни ыытарга, оҕуруот аһын  (элитнэй суортар эмиэ киирэллэр) эбии сырдатар технологиялары туһанан, аһаҕас сиргэ эбэтэр тэпилииссэҕэ уонна парникка олордорго бэриллэр. Кээмэйэ оҥорон таһаарааччы бородууксуйата төһө элбэх буоларыттан тутулуктаах.

Маны сэргэ, оҕуруот аһын харайар сирдэри (овощехранилище) тутар уонна тупсарар тыа хаһаайыстыбатын оҥорон таһаарааччылара эмиэ субсидияҕа тиксиэхтэрин сөп. Бырайыактары Тыа хаһаайыстыбатын министиэристибэтин иһинэн үлэлиир анал хамыыһыйа сүүмэрдиэҕэ.

Билигин хортуоппуйу уонна да атын оҕуруот аһын олордуутунан дьарыктанар оҥорон таһаарааччыларга өйөбүл Тыа хаһаайыстыбатын сайыннарар уонна тыа хаһаайыстыбатын бородууксуйатын, сырьетун уонна атыытын хонтуруоллуур судаарыстыбаннай бырагыраама чэрчитинэн оҥоһуллар.

«Развитие овощеводства и картофелеводства»  саҥа федеральнай бырайыак 2023 сыл тохсунньу 1 күнүттэн үлэлиэҕэ. Оттон оҕуруот аһын харайар сирдэри тутууга уонна тупсарыыга көрүллэр үрдэтиллибит субсидия 2024 сыл тохсунньу 1 күнүттэн  олоххо киириэҕэ.