"Музейга түүн" искусствоны сэҥээрээччилэри түмүөҕэ

Бу киэһэ интэриэһинэй экскурсиялар, култуура уонна искусство деятеллэрин кытта көрсүһүүлэр, маастар-кылаастар ыытыллыахтара. Тэрээһини артыыстар уонна музыкальнай кэлэктииптэр киэргэтиэхтэрэ. Ону сэргэ, киирии билиэтинэн өйдөбүнньүк бэлэхтэр оонньонуохтара.
 “Генерация Республики”  быыстапка сүрэхтэниитигэр ыалдьыттар Саха сирин ааттаах-суоллаах живописецтарын, графиктарын уонна скульптордарын айар үлэлэрин кытта билсиэхтэрэ. Маны таһынан, саха бастакы худуоһунньуга Иван Попов туһунан «Не хороните меня без Ивана» киинэ трейлерин көрдөрүү,  худуоһунньук Михаил Старостины уонна скульптор Николай Чоччасовы кытта көрсүһүүлэр буолуохтара. 
Айар куттаах дьоҥҥо “Арт-холл” мастарыскыай туспа бырагырааманы бэлэмнээбит. Ол курдук, линогравюра тиэхиньикэтигэр холонуон баҕалаахтар маастар-кылааска кыттан, Саха сирин гиэрбэтин ойуулаан көрүөхтэрэ. Акрил кыраасканан үлэ уратытын билиэн баҕалаахтар натюрморт суруйан холонуохтара. Оттон  кырачаан ыалдьыттар аппликациянан дьарыктаныахтара. 
Маны сэргэ, “Музейга түүн” кыттааччыларын араас аахсыйалар, кэрэхсэбиллээх быыстапкалар, арт-практикумнар уо.д.а. сэргэх бырагыраама күүтэр.  
Тэрээһин ыам ыйын 21 күнүгэр киэһэ 19.00 чаастан түүн 23.00 чааска диэри буолуоҕа. Музей аадырыһа: Дьокуускай куорат, Киров уул., 9.
Киирии билиэт сыаната: улахан дьоҥҥо – 500 солк., биэнсийэлээхтэргэ, устудьуоннарга, элбэх оҕолоохторго, инбэлииттэргэ – 300 солк. (туоһулуур докумуоннаргытын умнумаҥ). 18 саастарыгар диэри ыалдьыттарга – 250 солк. 7-гэр диэри саастаах оҕолор улахан дьону кытта босхо киирэллэр. Болҕойуҥ, сорох маастар-кылаастар туспа төлөбүрдээхтэр.