Минньигэстик аһааҥ

Хас биирдии хаһаайка дьиэлээхтэрин судургу, ол эрээри тотоойу уонна сонун бүлүүдэлэринэн күндүлүөн баҕарар. Онон сиэттэрэн түргэнник оҥоһуллар ырысыаптары үллэстэбит.

Сымнаҕас пицца

Састааба:

Бурдук – 175 г;

Туус – амсайан көрөн;

Мас арыыта – 1 ост. нь.;

Доруоһа – 1 ч.нь.;

Уу – 125 мл.

Астааһына:

Бурдугу, тууhу уонна доруоһаны бииргэ холбоон буккуйабыт (миксер эбэтэр комбайн туттуохха сөп). Туспа иhиккэ ууну уонна арыыны холбуубут. Аа-дьуо булкуйа туран, бурдукпутугар уубутун кутабыт уонна биир маасса  буолуор диэри, онтон остуолга таhааран 2-3 мүнүүтэ илиибитинэн мэhийэбит. Тиэстэбитин иhиккэ уган баран, 40 мүнүүтэ сылаас сиргэ уурабыт, икки төгүл улаатыахтаах. Тахсыбытын кэннэ 1-2 мүнүүтэ мэhийэбит уонна тэнитэбит. Тимир лиискэ ууран баран ханнык баҕарар начыыны кутабыт. Сылыйбыт оһоххо саhарчы буhуор диэри туруорабыт.

Эриллибит эттэн минньигэс запеканка

Састааба:

Эриллибит эт – 600 г;

Хортуоппуй – 2 устуука;

Помидор – 2 устуука;

Эриэппэ луук – 2 устуука;

“Пармезан” (кытаанах сыыр) – 150 г;

Барбекю соуһа – 3 ост. нь.;

Туус, хара мэлиллибит биэрэс;

Майонез – 4 ост. нь.

Астааһына:

Бастаан хортуоппуйбутун ууга буһарабыт. Эриллибит эккэ тууһу, туманы уонна барбекю соуһун эбэн булкуйабыт. Итиини тулуйар пуормаҕа эриллибит эппитин тэлгэтэ уурабыт, майонеһынан сотобут. Луугу чараастык төгүрүктүү быһаттыыбыт уонна эппит үрдүгэр тарҕатабыт. Эрдэттэн буһарбыт хортуоппуйбутун төгүрүктүү кырбастыыбыт уонна эппит, луукпут үрдүлэригэр тарҕата уурабыт. Ити кэнниттэн запеканкабытын духуопкаҕа угабыт. Чаас аҥаарынан хостоон баран үрдүгэр кырбастаммыт помидору, түөркэлэммит сыыры уурабыт. Онтон сыыра ууллуор диэри төттөрү духуопкаҕа уган туруора түһэбит.

Кытай лэппиэскэтэ

Састааба:

Тиэстэтигэр:

Сылаас уу – 240 мл;

Бурдук – төһөнү ыларынан. Илиибитигэр сыстыбат тиэстэ буолуохтаах. Аччаабыта 30 мүн. сынньата уурабыт;

Эриллибит эт – 800 г;

Чеснок – 2 өлүүскэ;

Эккэ кутуллар тума – 1 ч. нь.;

Туус – 0,5 ч. нь.;

Күөх луук, укуруоп уонна амтаннаах буоларыгар хара биэрэс наада.

Астааһына:

Тиэстэбитин  аҕыс чааска араарабыт. Чараас гына тэнитиллибит лэппиэскэҕэ эриллибит эппитин уурабыт. Үс муннук быһыылаах таҕыстаҕына, кыратык тэнитэн биэрэбит уонна кураанах, сылыйбыт итии хобордооххо икки өттүнэн 3-5 мүнүүтэ хаппахтаан туран буhарабыт. Буhан тахсыбыттарын кэннэ ынах арыытынан сотобут.

Соботтон тотоойу бүлүүдэлэр

Саас салгыннаары гыммыт собоҕутун фарштаан тоҥорон хаһааннаххытына, аскытын буорту гыммаккыт.

Астааһына:

Собобутун хатырыктыыбыт, хайыҥын уҥуоҕун ылан кэбиһэбит. Ол кэннэ иһин хайытан, сэрэнэн үөһүн уонна суон оһоҕоһун ороон быраҕабыт. Собобутун мясорубкаҕа эриллэр гына бысталыыбыт. Хаста да мясорубкалыыбыт, эриллибит фарш бэлэм.

Бу фарштан хортуоппуйдаан, лапсалаан эбэтэр рис кутан миин буһарыахха сөп. Туманы бэйэҕит сөбүлүүргүтүн кутаҕыт.

Бэлэм фаршы тууһаан-тумалаан, бэйэтин сүмэһинигэр мөлтөх уокка буһарыахха сөп, уу, арыы кутуллубат, лаппаахынан булкуйан буһарыллар. Маннык буспут фаршынан «Саҕынньахтаах собо» оҥоһуллар. Оттон буспут рис эптэххэ, атын минньигэс бүлүүдэлэр тахсаллар:

1. Бэлимиэн;

2. Сиикэй сымыыты эбэн, кэтилиэт;

3. Эмиэ сиикэй сымыыттары кутан, блины оҥоруохха сөп. Блинылары араҥанан уурдахха, собо туорт бэлэм.

Эттэн «Оҕус хараҕа» рулет

Састааба:

1 кг эриллибит эт;

1 улахан эриэппэ луук;

Чеснок – 5-6 өлүүскэ;

Туус, тума;

Кыратык хара биэрэс;

1 сиикэй сымыыт;

5 устуука буспут сымыыт.

Астааhына:

Эриллибит эккэ эбии эриэппэ луук, чеснок эрийтэрэбит. Туус, биэрэс кутабыт. Сиикэй сымыыты кутан, биир маасса буолуор диэри булкуйабыт. Духуопкабыт лииhин мас арыынан сотобут, ол үрдүгэр салапаан уурабыт. Салапааммыт үрдүгэр эриллибит эппитин тэлгэтэбит. Эрдэ буспут сымыыттарбытын хахтаан уурталыыбыт уонна салапаанынан көмөлөһүннэрэн рулеттыы эрийэбит. Салапааммытын ылан быраҕабыт. Духуопканы 180°C кыраадыска диэри сылытан баран, 30-40 мүнүүтэ буһарабыт. Ол кэнниттэн түөркэлэммит сыыры, укуруобу кутан, эмиэ 15-20 мүнүүтэ уган ылыахха сөп.

Креветкэ дыраһааҥка

Састааба:

Креветкэ – 300 г;

Миин – 500 г (эт миинэ – 200 г, балык миинэ – 300 г);

Лимон аҥаара;

Моркуоп – 1 устуука;

Күөх луук;

Укуруоп.

Астааһына:

Буспут, ыраастаммыт креветкэни формаҕа эбэтэр бүлүүһэҕэ уурабыт. Үрдүнэн петрушка, укуруоп, буспут моркуоп, лимон ууран киэргэтэбит, сэрэнэн желатиннаах эт эбэтэр балык миинин кутабыт. Холодильникка сойута уурабыт.

Желатины бэлэмнээһин: Сойбут мииҥҥэ кутан, 40 мүнүүтэ туруоруллар, булкуйа туран оргута түһүллэр, желатина сууралыннаҕына таһаарыллар уонна сиидэлээн баран сойутуллар, онтон креветкэҕэ кутуллар.

Оҕуруот астаах пааста

Састааба:

Спагетти лапса.

Соуска: аджика, сыыр, биэрэс арааһа, помидор, луук уонна моркуоп эбиэххэ сөп.

Астааһына:

Аджиканы киһи бэйэтэ оҥоруон сөп. Биир киилэ помидорга чеснок, ньыһыллыбыт кыһыл уонна хара биэрэс, биир чили биэрэс, кыра туус уонна ч.нь. аҥаара уксус эбэн, кыратык тэптэрэ түһүллэр, ол эбэтэр оргуйаатын кытта араараҕыт.

Маҥнай соус оҥоһуллар: кыһыл, саһархай биэрэһи луугу, помидору кытта ыһаарылыыбыт, аджиканы эбэбит уонна биэс мүнүүтэ оргута түһэн баран, плитканы араарабыт. Үрдүгэр түөркэлэммыт сыыры кутабыт, кыратык туруора түһэбит.

Оҕуруот аһа буһа турар кэмигэр ууга лапсабытын буһарабыт. Буспутун кэннэ өлүүнэн төгүрүччү уурабыт. Сыыра ууллубут аджикабытын лапсабыт үрдүгэр кутабыт.

Амтаннаах кэтилиэт

Састааба:

500 г ынах этэ;

Петрушка, укроп;

Чеснок – 2 өлүүскэ;

Бурдук;

Оҕуруот аһын арааһа;

Туус, тума.

Астааһына:

Эти улахан соҕус куһуогунан быһабыт уонна анал өтүйэнэн илдьи сынньабыт. Үрдүгэр бытархай чесногу булкуйабыт уонна туустаах бурдукка ыймаан баран, арыыга ыһаарылыыбыт. Гарнирга соломолуу быһыллыбыт оҕуруот аһа барсыаҕа.