Мин Куоратым

Дьокуускай куораппытыгар Иллээх ыаллаһыы сыла биллэриллибитинэн, биһиги хаһыаппыт «Мин куоратым» сонун  бырайыагы  тэрийдэ. Бырайыакка куораппытыгар биллэр-көстөр дьоммутун сырдатыахпыт. Оттон саҥа бырайыагы бэйэбититтэн саҕалыыбыт. Ол курдук, хаһыаппыт кылаабынай эрэдээктэрэ Уйбаан Уһуунускай – сахаҕа биир биллэр-көстөр киһи. Иван Петрович – 40-тан тахса сыл ыстаастаах суруналыыс, суруйааччы, уопсастыбанньык, этнограф, фольклорист, СӨ култууратын үтүөлээх үлэһитэ, Арассыыйа суруйааччыларын Сойууһун чилиэнэ, норуоттар икки ардыларынааҕы бириэмийэлэр лауреаттара. Сөбүлүүр чыыһылата «5» буолан, бу балаһаҕа бэйэтин тапталлаах куоратыгар биэс бэлиэ миэстэтин кэпсиир. 

ЧЕПАЛОВА, 2

Аан бастаан куоракка алта саастаахпар 1969 сыллаахха кэлбитим. Бу аппа уҥуор – былыргы саха интеллигенциятын түөлбэтэ. Ол улахан убайбытыгар Ньукулайга тиксибит. Эдьиийим манна ыал буолан олорбута. Бу – Харитонов баай дьиэтэ. Кыыс сүгүннэрэн аҕалан,  дьиэҕэ убайым ааҕы кытта дьукаахтаһан олорбуппут. Эдэр сааспыт кэрэ кэмнэрэ бу тэлгэһэттэн саҕаламмыта. Билигин манна убайым, гроссмейстер Петр Ушницкай олорор.

ЧОЧУР МЫРААН

Мыраан миэхэ күүһү - уоҕу биэрэр, манна таҕыстахпына, санаалыын чэпчиибин, дууһалыын сынньанабын. Эдэр-сэнэх сылдьан мырааҥҥа сотору-сотору дабайар этибит, оннооҕор кэргэним ыарахан сырыттаҕына биир томторугар көтөҕөн таһаарбыттаахпын (күлэр-аапт). Билигин, саас ылан, доруобуйа да айгыраан, кыах тиийбэт. Ол да буоллар биирдэ эмэ таҕыстахпына, арыылаах алаадьынан күндүлүүбүн. “Ньургуһун” хамсааһыны саҕалыахпыттан оҕолорго, ыччатарга бөҕү - сыыһы хомуйтарыы, араас тэрээһини оҥорууну үтүө үгэскэ кубулуттум. Билигин бэйэлэрэ да бараллар.

СПОРТ ДЫБАРЫАҺА

“Эдэр саас” хаһыат кыаҕын ылбыт кэмигэр элбэх уораҕайдарга, элбэх дьоро киэһэлэри оҥорбутум. Бу манна: “Макарена – шоу”, “Фейерверк – шоу”, “100 - Эдэр саас – шоу”.  “100 эдэр саас” шоуга эбии трибуна киллэрэн, 2 000 тахса киһини батарбыппытын таһынан, Бэчээт дьиэтигэр диэри халыҥ уочарат турбута. “Эдэр саас” хаһыат эрэдээксийэтэ куруук аана аһаҕас буолара, ыччакка түмсэр, айар-тутар сир буолбута. Бастакы нүөмэргэ Аскалон Павлов тахсыбыта, онтон Толбоновтар, Дьөгүөрэптэр, Николай Андросов, Павел Семенов ... Альбина Борисова ... бука бары тахсан  саҕалаабыттара.   Уруккулар Аркадий Алексеев, Владимир Татаринов, Галина Шахурдина умнуллубатахтара. Көрү-күлүүнү Алексей Павлов, Александр Бурнашов, клоуннар күөдьүппүттэрэ, үҥкүү, спорт сулустара, “Мозика”, өр кэмҥэ кэлбэтэх кыайыылара кэлбиттэрэ.

МАМОНТ ПААМЫТЫННЬЫГА

Олоҕум аргыһын булуом иннинэ «Елочка» оройуонугар икки мэндиэмэннээх дьиэҕэ олорбутум. Бу ирбэт тоҥ дьиэтин чугаһыгар турар Мамонт паамытынньыга куораппыт – биир бэлиэ көстүүтэ буолар. Баар буолуоҕуттан манна дьон бөҕө  хаартыскаҕа түһэн барар. Мин кэргэн ылар кыыспын бастаан уоспунан уоһугар таарыйыахтаахпын диирим. Ол туоһута ити – Мамонт.

“ЭДЭР КОММУНИСТ”

Манан, Толстой уонна Курашов уулуссаларын быһа охсуһуутугар икки этээстээх мас дьиэ баара. Онно “Эдэр коммунист” хаһыат эрэдээксийэтэ турбута. Ол кэмнэр миэхэ элбэх саҥа саҕахтары арыйбыттара. “Эдэр коммунист” общественнай хаһыат буолтугар ыччат хаһыата суох хайдах инники кэскили сайыннарыахпытый диэн санааттан 1993 с. “Эдэр Саас” хаһыаты тэрийбитим... Айталина СОФРОНОВА