«Мин идэм IT — 2022» VII-с өрөспүүбүлүкэтээҕи куонкурус муниципальнай түһүмэҕэ ыытыллар

2022 сыл муус устар 6-8 күннэригэр «Кванториум» оҕо технопааркатыгар «Мин идэм IT — 2022» VII-с өрөспүүбүлүкэтээҕи куонкурус муниципальнай сүүмэрдиир түһүмэҕэ ыытыллар.  Бу туһунан Ф.И. Авдеева аатынан оҕо айымньытын Дыбарыаһа иһитиннэрдэ. 
Куонкурус сүүмэрдиир түһүмэҕэ «Хакатона» форматынан — ИТ-бырайыактары оҥоруу марафонун быһыытынан ыытыллар. Икки күн иһигэр кыттааччылар мобильнай сыһыарыы эбэтэр веб-сервис прототибын оҥороллор уонна куонкурус дьүүллүүр сүбэтигэр билиһиннэрэллэр.  
IT-эйгэҕэ үүнэр көлүөнэҕэ анаммыт саамай киэҥ далааһыннаах тэрээһин Саха Өрөспүүбүлүкэтигэр эрэ ыытыллар, Арассыыйа атын субъектарыгар атылыыта суох. Тэрээһин араас өрүттэри ситимниир – судаарыстыбаны, бизнеһи, үөрэҕириини уонна уопсастыбаны. 
Күрэх сүрүн сыала – идэтийии ориентацията, информационнай технология эйгэтигэр ыччат көҕүлээһинин уонна саҥа саҕалыыр предпринимателлэри өйөөһүн.  
Тэрээһин көҕүлээччилэрэ – «СӨ ИТ-салаа сайдыытын Ассоциацията» кэмиэрсийэтэ суох партнерство. Куонкурус СӨ инновацияҕа, цифровой сайдыыга уонна инфокоммуникационнай технологияларга Министиэристибэтин, СӨ үөрэҕириигэ уонна наукаҕа Министиэристибэтин, «Якутия» Технопаарка» САТ, «Юные Якутяне» өрөспүүбүлүкэтээҕи ресурса киинин, М.К. Аммосов аатынан Хотугулуу-Илиҥҥи Федеральнай университет, П.И. Дудкин аатынан Дьокуускайдааҕы сибээс уонна энергетика колледжын, АГИКИ, Покровскайдааҕы колледж уо.д.а. өйөбүллэринэн ыытыллар.  
«Мин идэм IT — 2022» VII-с өрөспүүбүлүкэтээҕи куонкурус муниципальнай түһүмэҕин бырагыраамата http://mp-it.ru официальнай веб-сайтка баар.
Тэрийээччилэр:
- Олохтоох дьаһалта үөрэҕириигэ Управлениета;
- Ф.И. Авдеева аатынан оҕо айымньытын Дыбарыаһа, «Кванториум» оҕо технопаарката;
- Техническэй айымньы киинэ, «IT-Куб» оҕолору цифровой үөрэхтээһин киинэ;
- «Глобальнай үөрэхтээһин киинэ» гимназия.