Кыаммат ыал оҕолорун планшетынан хааччыйыахтара

Үөрэх төрдүс чиэппэрэ саҕаламмытынан, СӨ Үөрэҕин уонна наукатын миниистирэ В.Егоров инстаграмыгар үөрэнээччилэри уонна төрөппүттэри эҕэрдэлээтэ.

Төрдүс чиэппэр оскуолаҕа буолбакка, дьиэттэн олорон үөрэнии ньыматынан саҕаланар буолла.

Дьокуускайга оҕолор ыраахтан олорор үөрэхтэрин тэрийэр үлэ муус устар ый саҕаланыаҕыттан барар. Бастакынан техническэй күчүмэҕэйдэри быһаарыы соруга толоруллар. Ол курдук, 500-тэн тахса кыаммат ыал оҕото  электроннай тэриллэрэ (планшет, ноутбук), интэриниэккэ холбонуулара суоҕа билиннэ.

Бу кыһалҕаны быһаарарга, баһылык Сардаана Авксентьева дьаһалынан, куорат дьаһалтата кыаммат ыал оҕолоругар планшеттары атыылаһан биэриэҕэ. Оттон интэриниэккэ 1500 ыал холбоноругар, өрөспүүбүлүкэ таһымнаах көмө наадатын, Бырабыыталыстыбаттан уонна сүрүн оператордартан сүҥкэн өйөбүл эрэйиллэрин туһунан өссө муус устар 2 күнүнээҕи коронавируһу утары тэрээһиннэри дьүүллэһии мунньаҕар этиллибитэ.

Дьокуускайга 46 тыһыынчаттан тахса оҕо оскуолаҕа үөрэнэр.

Үөрэхтээһин управлениетыгар иһитиннэрбиттэринэн, куорат дьаһалтата  525 планшет атыылаһар, уопсай суумата 6,4 мөл. солк., ортотунан биир планшет сыаната 12 тыһ. солк.