Киин куорат 2-с №-дээх оскуолата аҕа Күнүн оһуохайынан бэлиэтээтэ

Дьокуускай 2-с №-дээх оскуолатын үрдүкү кылааһын үөрэнээччилэрэ аҕаларын кытта муус устар  4 күнүгэр оһуохай түһүлгэтин төрүттээтилэр. Аҕа Күнүгэр уонна Саха АССР төрүттэммитэ 100 сылыгар анаммыт тэрээһини оскуола дириэктэрэ Василий Владимиров уонна аҕа сүбэтин бэрэссэдээтэлэ Любомир Михайлов көҕүлээтилэр. Бу туһунан 2-с №-дээх оскуола аҕаларын сүбэтэ иһитиннэрдэ. 
Оһуохай тылын этээччи – Саха Өрөспүүбүлүкэтин култууратын үтүөлээх үлэһитэ,  аҕа сүбэтин бырабылыанньатын чилиэнэ Виктор Игнатьев. Сорох оҕолор оһуохайга аан бастакыларын кыттыбыттар, онон үөрэнээччилэргэ саха норуотун үгэс буолбут сиэр-туом үҥкүүтүн ис хоһоонун туһунан кэпсээтилэр.
Оскуола аҕаларын сүбэтин салайааччыта Любомир Михайлов өбүгэ үгэстэрин үйэтитии дьоһун суолталааҕын бэлиэтээтэ. «Оһуохай – күргүөмүнэн сиэр-туом үҥкүүтэ, Айыыларга үҥүүнү кытта сибээстээх уонна норуот сомоҕолоһуутун күүһүрдэр кыахтаах», - диэтэ кини.
Оскуола дириэктэрэ Василий Владимиров иһитиннэрбитинэн, бу сайын оскуола үбүлүөйүгэр кэлэктиип уонна оскуоланы араас сылларга бүтэрбиттэр улахан оһуохайы тэрийиэхтэрэ. 
Бу күн кэрэ аҥардар – ийэлэр уонна учууталлар эр дьону, аҕалары хомуска оонньоон эҕэрдэлээтилэр.