Керемясов кэриэһигэр Дьокуускай VI чемпионата

Арассыыйа физическэй култууратын уонна  спордун үтүөлээх үлэһитэ, СӨ үтүөлээх тренерэ Валерий Петрович Керемясов 65 сылыгар аналлаах Дьокуускай куорат көҥүл тустууга чемпионата алтыс төгүлүн ыытылынна.

Чемпионат кыттыылаахтарын Дьокуускай куорат баһылыгын солбуйааччы Руслан Тимофеев, Дьокуускай куорат тустууга Федерациятын бэрэссэдээтэлин солбуйааччы, СӨ үтүөлээх тренерэ Прокопий Иванов, Дьокуускай куорат физическэй култуураҕа уонна спорка управлениетын начаалынньыга Эдуард Ефимов, СӨ култууратын үтүөлээх үлэһитэ, В.П. Керемясов бииргэ төрөөбүт балта Лена Петровна Керемясова эҕэрдэлээтилэр. Бастыҥ үлэлээх тренердэр Владимир уонна Ян Емельяновтарга “Тустуу сайдыытыгар киллэрбит кылааттарын иһин” РФ Бочуотунай грамоталара туттарылыннылар. Сүрүн судьуйа Станислав Афанасьев турнирга 93 бөҕөс кыттарын, турнир ыытыллар бэрээдэгин билиһиннэрдэ. Саха эстрадатын артыыһа Станислав Гольдеров толоруутугар эҕэрдэ ырыа дьиэрэйдэ.

Биллэрин курдук, Чурапчы спортивнай оскуола-интэринээтигэр улуу тренер Д.П. Коркин тустууга оскуолатыгар өрөспүүбүлүкэ оройуоннарыттан элбэх оҕо тиийэн үөрэммитэ, дьарыктаммыта. Дмитрий Петрович Коркин уонна кини соратнига Константин Сергеевич Постников спортоскуоланы бүтэрбит тустуук уолаттары дойду киин куораттарыгар үөрэххэ ыыталаабыттара, салгыы тустуунан дьарыктаналларыгар  киэҥ  аартыгы арыйбыттара.  Спорт оскуолатын 1967 с. бастакынан бүтэрбит Василий Уваров, Прокопий Шестаков Белоруссия киин куоратыгар Минскэйгэ физкултуура институтугар киирэн, 1972 с. ситиһиилээхтик үөрэнэн бүтэрбиттэрэ. Кинилэр суолларын элбэх тустуук уол батыспыта. Дьокуускай куорат 3 №-дээх оҕо спорт оскуолатыгар тренердиир Валерий Петрович Керемясов бэйэтин бастыҥ иитиллээччитэ Владислав Андреевтыын Минскэйгэ анаан-минээн дьарыктана тиийбиттэрэ.

Ити туһунан СӨ үтүөлээх тренерэ Василий Петрович Уваров маннык кэпсээтэ: “Саха сирин күүстээх маастара, Арассыыйа чөмпүйүөнэ, тренер Валерий Керемясов Белоруссияҕа тиийэн, үөрэнээччитэ Владислав Андреевы Белоруссия элбэх төгүллээх чөмпүйүөнэ, норуоттар икки ардыларынааҕы турнирдар кыайыылааҕа, Европа, аан дойду призера оҥортообута. Валерий Петрович киһи быһыытынан сиэрдээх, үтүө майгылаах, дириҥ билиилээх-көрүүлээх тренер быһыытынан биллибитэ. Айар-тутар үгэнигэр сылдьан, массыына оһолугар түбэһэн хомолтолоохтук биһи кэккэбититтэн туораабыта. Дьокуускайга тустуу бигэ базатын туттаран, Белоруссия курдук улахан дойдуга таһаарыылаахтык үлэлээн, бэйэтин туһунан үтүө өйдөбүлү хаалларда. Чулуу иитиллээччитэ Владислав Андреев билигин Минскэйгэ  олохсуйан, ыччаттарга сүрүн тренеринэн үлэлиир”.

Дьокуускай куорат физическэй култуураҕа уонна спорка управлениетын начаалынньыга, тустуу маастара Эдуард Ефимов турнирга кыттааччылар ахсааннара сыллата элбээн иһэрин, эдэр, кэскиллээх саҥа ааттар тахсалларын,  Валерий Петрович туруорсуутунан 3 №-дээх тустууга аналлаах оҕо спорт оскуолатыгар 1998 сыллаахха спорт саала киллэриллибитин, билигин бу оскуола В.П. Керемясов аатын сүгэрин,  “Иван Ярыгин” Гран-при турнирын кыайыылааҕа Ньургун Иванову, норуоттар икки ардыларынааҕы кылаастаах маастардар Павел Капитоновы, Алексей Соловьеву уо.д.а. таһаартаабыт үтүөлээх тренер Михаил Степанович Скрябины кытта бииргэ алтыһан үлэлээбиттэрин, 90-ус сылларга улуустар үксүлэрэ кыайталыыр, тустууга улахан хаалыылаах Дьокуускай куорат билигин күүстээх утарсыыны (конкуренцияны) оҥорор буолбутун бэлиэтээтэ. Бу оскуола тустуук оҕолоро “Боотурдар оонньууларыгар” бастаабыттарын, быйыл 9 №-дээх  спорт оскуолатын арыйбыттарын, Мархаҕа, Автодорожнай уокурукка, ДСК диэки спорт оскуолаларын аһар санаалаахтарын, куоракка тыһыынчаттан тахса оҕо тустуунан дьарыктанарын, инникитин Дьокуускай куораттан олимпийскай чөмпүйүөннэр, призердар тахсалларыгар киэҥ өрүттээх үлэ ыытылларын санаппыта. Спорт миниистирэ Леонид Спиридонов, куорат баһылыга Евгений Григорьев өйүүллэрин, физкултууранан уонна спордунан дьарыктанар дьон ирээтин элбэтэргэ, итиэннэ “хас биирдии киһи чөл туруктаах, чиргэл, тэтиэнэх буоларын ситиһэр соруктаахпыт” диэн бигэ санаатын уонна онно эрэнэрин биллэрдэ.

Бэрт сэргэх хапсыһыылар түмүктэринэн 57 кг Любомир Ашеин (Чурапчы института), 61 кг Яков Павлов (ХИФУ), 65 кг Эдуард Попов (Чурапчы института), 70 кг Игорь Матвеев (Р.М. Дмитриев аатынан ОЭУ), 74 кг Айсен Потапов (ХИФУ), 79 кг Анатолий Никитин (ХИФУ), 86 кг Виталий Ефремов (Чурапчы института), 92 кг Степан Иванов (Р.М. Дмитриев аатынан ОЭУ), 97 кг Максим Толмачев (ХИФУ), 125 кг Никита Валеев (3 №-дээх оҕо спортоскуола) кыайыылары ситистилэр. Бары бириистээх миэстэлэргэ тиксибиттэр Дьокуускай куорат дьаһалтата оҥорторбут кыраһыабай оҥоһуулаах В.П. Керемясов мөссүөннээх өйдөбүнньүк мэтээллэринэн, кубоктарынан, дипломнарынан, Керемясовтар аймах олохтообут “Одарич” маҕаһыын сэртипикээттэринэн наҕараадаланнылар.

В.П. Керемясов бииргэ төрөөбүттэрэ, дьиэ кэргэнэ туруорбут 100 тыһ.солк. сүрүн бирииһинэн Р.М. Дмитриев аатынан Олимпийскай эрэл училище IV кууруһугар үөрэнэр 19 саастаах Нам ыччата Игорь Матвеев наҕараадаланна: “Түһүлгэ биэрбититтэн үөрүүм улахан, быйыл маастары толорбутум, Уһук Илин чемпионатыгар улахан дьоҥҥо бастаабытым,  тренерим  Прокопий Семенович Иванов. Кумирым 74 кг тустар дагестанец, Олимпийскай оонньуу чөмпүйүөнэ Разамбек Жамалов. Кини олус чаҕылхай тустуулаах. Арассыыйаҕа уонна аан дойдуга бастыыр сыаллаахпын-соруктаахпын”.

Дьокуускай куоракка спорт, тустуу сайдар кэскилэрэ киэҥ.