Хаарбах дьиэлэри көтүрүү саҕаланна

Хаарбах дьиэлэртэн дьону көһөрүү федеральнай уонна олохтоох бырагыраамаларынан былаан быһыытынан үлэ ыытыллар.

Дьокуускайга бүгүҥҥү күҥҥэ түөрт дьиэни көтүрүөхтэрэ. Олортон биирдэстэрин Челюскин уулуссаҕа турар дьиэни номнуо көтүрэн бүтэрэн эрэллэр. Бу дьиэ ГРЭС оройуонугар баар. 1970 сыллааҕы тутуу 2011 сыллаахха хаарбаҕынан быһаарыллыбыта, олохтоохтор билигин толору хааччыллыылаах дьиэлэргэ көһөн тураллар. Бу оройуоҥҥа өссө да уонча дьиэ көтүллүөхтээх. Көтүрүүгэ “Якутдорстрой” тэрилтэ үлэһиттэрэ күүс-көмө буола сылдьаллар.

Дьокуускайга 60-70 сылларга тутуллубут дьиэлэр куорат үрдүнэн элбэхтэр. Ол курдук ГРЭС, Сайсары, 17 кыбаартал оройуонугар. Хаарбах, аварийнай дьиэлэртэн дьону көһөрүү федеральнай уонна өрөспүүбүлүкэ олохтоох бырагыраамаларынан үбүлэнэн ыытыллар. Бүгүҥҥү туругунан көһөрүү саҥа бырагырааматыгар 2012 сылтан кэнники аварийнайынан биллэриллибит дьиэлэр киирсиэхтэрэ.