Евгений Григорьев: «Ленин проспегар суол үлэтэ төгүрүк суукканан ыытыллыаҕа»

Бүгүҥҥү күннээҕи туругунан, Ленин проспегын хапытаалынай өрөмүөнүгэр, Орджоникидзе болуоссатыттан Норуоттар доҕордоһууларын болуоссатыгар диэри учаастакка сири хаһар тиэхиньикэ, 4 экскаватор, 2 суол катога, 8 самосвал, грейдер, бульдозер, погрузчик, 26 оробуочай үлэлииллэр. Бу туһунан Олохтоох дьаһалта пресс-сулууспата иһитиннэрдэ.
 Куорат баһылыга Евгений Григорьев бэлиэтээбитинэн, Саха Өрөспүүбүлүкэтин Ил Дархана Айсен Николаев сорудаҕынан бэдэрээтчит «Дорстрой» ХЭТ үлэтэ күүһүрдүллэн биэрдэ. 
«Бүгүҥҥү күҥҥэ суол оҥорооччулар икки түһүмэҕинэн үлэлииллэр. Бастакы түһүмэх сарсыарда 8 чаастан киэһэ 9 чааска диэри үлэлиир, иккис түһүмэх – киэһэ 9 чаастан сарсыарда 6 чааска диэри. Үлэ төгүрүк суукканан өрөбүлэ суох ыытыллар, 1 маайтан ураты. Итини таһынан, хостоммут сир араҥатын түүҥҥү кэмҥэ таһар туһунан быһаарыы ылылынна, итиэннэ Кулаковскай уулуссатыттан Петровскай уулуссатыгар диэри учаастак тырааныспар сырыытыгар арыллар», - диэтэ Евгений Григорьев.
Учаастак ыам ыйын 10 күнүгэр арыллара былааннанар, билигин быстах болдьохтоох схеманы арыйарга ИДьМ «Якутское» МУ ГИБДД салаатын кытта үлэ барар.
«Главстрой» МХТ информациятынан, Орджоникидзе болуоссатыттан Короленко уулуссатыгар диэри учаастакка сир таҥаһа олохтонон бүтэн эрэр, Курашов уулуссатын кытта быһа охсуһууга гаас ситимнэрин таһаарыы үлэтэ ыытыллар. 
Короленко уулуссатыттан Аммосов уулуссатыгар диэри учаастакка котлован оҥоһуллар уонна канализация ситимэ таһаарыллар. 
Гаас ситимин таһаарыы уонна сир таҥаһын оҥоруу Октябрьскай уулуссатыттан Ленин проспегын 25 №-дээх дьиэтигэр диэри учаастакка ыытыллар.
Ыам ыйын 25 күнүгэр диэри Аммосов уонна Курашов уулуссаларын быһа охсуһуутунан курдары сылдьар суол арыллыахтаах. 
Киров уулуссатыгар сүрүн сир үлэтэ бүтүөр диэри хааччахтааһын киирбэт. 
Бэлиэтээн эттэххэ, муниципальнай хантыраак усулуобуйатынан, Ленин проспегын хапытаалынай өрөмүөнэ икки түһүмэҕинэн ыытыллар. Бастакы түһүмэх – Орджоникидзе болуоссатыттан Норуоттар доҕордоһууларын болуоссатыгар диэри, иккис түһүмэх – Дзержинскэй  уулуссатыттан Хабаров уулуссатыгар диэри уонна Кулаковскай уулуссатыттан Краснояров уулуссатыгар диэри. 
Бастакы түһүмэх үлэтэ 2022 сыл балаҕан ыйын 30 күнүгэр диэри, иккис түһүмэх – 2023 сыл атырдьах ыйын 31 күнүгэр диэри түмүктэниэхтээхтэрэ. Уулусса хапытаалынай өрөмүөнүн уопсай уһуна – 2,9 км.