Дьиэ кыыллара көмүскэллээх буолуохтара

Муус устар 28 күнүгэр  Ил Түмэн судаарыстыбаннай мунньах дьокутааттара XXXVII-с пленарнай сессия бүтэһик ааҕыытыгар дьиэ кыылларын харайыы туһунан сокуону ылыннылар. Бу туһунан СӨ Ветеринарияҕа департамена иһитиннэрдэ. 
Сокуон бырайыагын быһаарыы суругар этиллибитинэн, сокуон уулуссаҕа быраҕыллыбыт дьиэ кыылларын иһин административнай эппиэтинэһи чопчулуур. Билиҥҥи кэмҥэ итинник эппиэтинэс федеральнай уонна өрөспүүбүлүкэ таһымнарыгар киирэ илигэ бэлиэтэннэ.
Суобаһа суох хаһаайыттар иитиэхтэрин уулуссаҕа быраҕан дьэллик кыыллар кэккэлэрин хаҥаталлар.
Сокуон бырайыагар олоҕуран, уулуссаҕа уонна атын уопсастыбаннай миэстэлэргэ көрүүтэ-истиитэ суох быраҕыллыбыт дьиэ кыылын иһин административнай эппиэтинэһи сүктэрэр Саха сиринээҕи КоАП-ка  5.4 саҥа ыстатыйа киирэр.
Итини кытта ыстараап көрүллэр. Гражданнарга – 1000-тан 1500 солкуобайга диэри, дуоһунастаах сирэйдэргэ – 3000-5000 солкуобай, юридическай сирэйдэргэ – 10 000-15 000 солкуобай ыстараап.
Сокуону хаттаан кэһии иһин ыстараап суумата үрдүүр: гражданнарга – 3000-5000 солкуобай, дуоһунастаах сирэйдэргэ – 30 000-40 000 солкуобай, юридическай сирэйдэргэ – 30 000-40 000 солкуобай. 
Боротокуоллары толоруу уонна административнай быраабы кэһиини көрүү боломуочуйата Ветеринария департаменыгар сүктэриллэр. Сокуон бырайыага иккис уонна бүтэһик ааҕыыга ылылынна.