Дезинфекция үлэтэ тохтообот

Куорат хаһаайыстыбатын үлэлэтэр сулууспа иһитиннэрэринэн, сэтинньи 30 күнүгэр коронавируһунан ыалдьыбыт дьон олорор аадырыстарыгар – уопсайа 124 элбэх кыбартыыралаах дьиэҕэ дезинфекция ыытылынна.

Бу үлэни муниципальнай хантараагынан “Аденалин” ХЭТ ыытар. Сэтинньи 22-30 күннэригэр барыта 978 аадырыс хабылынна.

Бэлиэтээн эттэххэ, маныаха Дьокуускай куорат олохтоох дьаһалтатыгар хаһаас пуондаттан бу үлэни үбүлүүр туһунан дьаһалга илии баттаммыта.

Роспотребнадзор коронавируһунан ыалдьыбыт дьон олорор аадырыстарын испииһэгин тустаах тэрилтэҕэ ыытар. Иһитиннэрии күн аайы киирэр. Онон сайаапка биэрэргит наадата суох.

Ыарыһах олорор подъеһыгар эрэ дезинфекция ыытыллар диэн куорат дьаһалтатын пресс-сулууспата өссө төгүл санатар.