Быйыл Арктическай оскуола үлэтин саҕалыыр

Норуоттар икки ардыларынааҕы Арктическай оскуола быйыл балаҕан ыйын 1 күнүгэр бастакы үөрэнээччилэрин көрсүөҕэ. Бу туһунан үөрэх министиэристибэтэ иһитиннэрэр.

Норуоттар икки ардыларынааҕы арктическай оскуола 7-11 кылаастаах. Манна дэгиттэр өйдөөх оҕолор үөрэнэллэригэр, сайдалларыгар кыах бэриллэр. Үөрэх бырагырааматынан төрөөбүт тылы, кыччаабыта икки омук тылын, IT-технологияны, программированиены үөрэтэллэр, араас секцияларга дьарыктаналлар.

Быйылгы сылга 7-с, 8-с, 10-с кылаастарга 60-нуу оҕону ылыахтара. Уопсайа 2020 сылга 180 оҕо үөрэниэхтээх.

Бэс ыйын 29 күнүттэн оскуолаҕа киириигэ сайабылыанньа тутан саҕалаабыттара, атырдьах ыйын 3-9 күннэригэр эксээмэннэр буолуохтара, атырдьах ыйын 10-16 күннэригэр оҕолору кытта кэппсэтиилэр ыытыллыахтара.

7-8 кылааска киирэргэ английскай тылы, математиканы уонна естесственнай наука предметтэрин туттарыахтара. 10-с кылааска английскайы, математиканы уонна профильнай предмети туттарыахтара.