Бизнес биэрэпискэ бэлэмнэнэр

2021 сыл бастакы кыбаарталыгар Саха өрөспүүбүлүкэтигэр аччыгый уонна орто бизнес субъектарын үлэлэрин биир кэлим федеральнай статистическай кэтээн көрүү – Аччыгый бизнес экономическай биэрэпиһэ ыытыллыа. Дьиэҥ таһыгар баар минньигэс бурдук астаах маҕаһыын, уопуттаах үлэһиттэрдээх массыына өрөмүөннүүр мастарыскыай, куораты үчүгэйдик билэр такси суоппара – бу барыта аччыгый бизнес.

Күн бүгүн биһиги дойдубутугар үлэлии турар тэрилтэлэр 75 %-нара – аччыгый бизнес бэрэстэбиитэллэрэ. Кинилэр кэтэх өҥөнү оҥорууга оруоллара олус улахан, дойду үрдүнэн 15 мөлүйүөн киһини үлэнэн хааччыйан олороллор.

Судаарыстыба туһааннаах өйөбүлү оҥороругар бу тэрилтэлэр хайдах үлэлииллэрин, туох кыһалҕалаахтарын билиэн наада. Маннык биэрэпис 5 сылга биирдэ оҥоһуллар уонна аччыгый уонна орто бизнес бэрэстэбиитэллэрин экономическай туруктарын сиһилии быһаарарга кыах биэрэр.

РФ сокуону оҥоруутугар сөп түбэһиннэрэн биэрэпискэ кыттыы булгуччулаах. Эрдэ ыытыллыбыт кэтээн көрүү түмүктэрин электроннай көрүҥүн Саха(Якутия)стат официальнай порталыгар көрүөххэ сөп.

Биэрэпискэ ким кыттарый?

Кэтээн көрүүгэ Аччыгый уонна орто бизнес субъектарын биир кэлим реестригэр (ЕРМСП) киирэр юридическай сирэйдэр, бааһынай (фермерскэй) хаһаайыстыбалары хабан туран бары предпринимателлэр кытталлар.

Биэрэпискэ хайдах кыттыахха сөбүй?

2021 сыл муус устар 1 күнүгэр диэри анал форма электроннай көрүҥүн толоруохха наада. Маны Госуслуги портал, Росстат отчуоту хомуйар Web тиһигин эбэтэр докумуон электроннай көрүҥүн хомуйуу оператордарын нөҥүө оҥоруохха сөп. Өскөтүн докумуон электроннай көрүҥүн туттарар кыах суох буоллаҕына, Саха(Якутия)стат саайтыттан анал форманы хачайдаан, толорон баран, судаарыстыбаннай статистика отделларыгар туттарыахха эбэтэр sakha.msp@gks.ru аадырыска ыытыахха сөп.

Бу куттала суох дуо?

Росстат хомуллубут информация кистэлэҥ буоларын мэктиэлиир. Киирбит сибидиэнньэ барыта түмүллэн эрэ баран туһаныллыа. Киһи эбэтэр тэрилтэ туһунан тус дааннай ханна да тахсыбат.

Ыйытыы үөскээтэҕинэ, хантан билсиэххэ сөбүй?

Туох эмэ ыйытыы үөскээтэҕинэ, 8(4112)42-47-77 нүөмэргэ (Саха(Якутия)стат) эрийэн  билсиҥ эбэтэр электроннай почтаҕа суруйуҥ sakha.msp@gks.ru.