Билсиҥ, саҥа миниистирдэр

Саха сирин бырабыыталыстыбатын бастакы солбуйааччы эбээһинэһин толорооччунан Кирилл Бычков ананна. Кини 2018 сыллаахтан бэрэссэдээтэли солбуйааччынан үлэлээбитэ.

Оттон Сергей Местников бырабыыталыстыба бэрэссэдээтэлин солбуйааччы э.т. ананна. Кини 2016 сыллаахтан Үүнэр көлүөнэ пуондатын салайбыта.

Саха сирин тырааныспарка уонна суол хаһаайыстыбатыгар миниистиринэн Владимир Сивцев ананна. Кини эрдэ экономика миниистирин солбуйааччынан үлэлээбит.

Саха сирин тутууга миниистиринэн Павел Кылатчанов ананна. Кини араас сылларга инвестиционнай бэлиитикэ департаменын салайааччынан, экономика миниистирин солбуйааччынан, Ил Дархан уонна бырабыыталыстыба дьаһалтатын тутууга департаменын салайааччынан үлэлээбит. 2019 сыллаахтан Өрөспүүбүлүкэтээҕи ипотечнай агентство генеральнай дириэктэринэн анаммыт.

Павел Иванов Саха сирин баайга-дуолга, сир сыһыаннаһыыларын миниистирин эбээһинэһин толорооччунан ананна.

Павел Иванов 1976 сыллаахха төрөөбүт, М.К. Аммосов аатынан СГУ юридическай факультетытн бүтэрбит. Араас сылларга Ил Түмэҥҥэ старшай референинэн, Дьокуускай дьаһалтатын быраапка департаменын салайааччынан, СӨ судаарыстыба-быраап департаменын салайааччынан, 2018 сыллаахтан Ил Дархан уонна бырабыыталыстыба дьаһалтатын бастакы солбуйааччынан үлэлээбит.