Байыаннай дьайыы кыттыылаахтарыгар социальнай чөлүгэр түһэрии көрүллэр

Саха сиригэр гражданнары социальнай чөлүгэр түһэрии үлэтэ салҕанар. Брифиҥҥэ үлэ уонна социальнай сайдыы миниистирэ Елена Волкова эппитинэн, анал байыаннай эпэрээссийэттэн эргиллибит, эбэтэр уоппускаҕа кэлбит гражданнарга Рихард Зорге уулуссатыгар баар Өрөспүүбүлүкэтээҕи социальнай-чэбдигирдэр кииҥҥэ анал социальнай чөлүгэр түһэрии бырагыраамата үлэлиир.

«Итини таһынан, анал байыаннай эпэрээссийэ кыттыылаахтарын чөлүгэр түһэрэр үлэ ыытыллар. Байыаннай сулууспалаахтар дьиэ кэргэттэригэр, оҕолоругар Өрөспүүбүлүкэтээҕи социальнай-чэбдигирдэр кииҥҥэ стационар көрүҥүнэн анал бырагыраама көрүллэр», – диэн бэлиэтээтэ Елена Волкова.

Өйөбүл биир төһүү күүстээх миэрэтэ – социальнай хантыраактар. Миниистир иһитиннэрбитинэн, өрөспүүбүлүкэ үрдүнэн социальнай хантыраактарга 500 мөл солкуобай туһуланна, ол иһигэр үлэ көрдөөһүнүгэр, бэйэ дьыалатын тэрийиигэ, тус хаһаайыстыбаны сайыннарыыга.  Елена Волкова бэлиэтээбитинэн, 3800-тэн тахса дьиэ кэргэни кытта социальнай хантыраак түһэрсилиннэ.

«Байыаннай дьайыы кыттыылаахтарын дьиэ кэргэттэрэ социальнай хантыраагынан бэйэ дьыалатын арыммыт наһаа үчүгэй холобурдара бааллар. Дьокуускайга биир дьиэ кэргэн кондитерскай сыах, өссө биир ыал таҥас тигэр ателье тэриннилэр. Биир байыаннай сулууспалаах дойдутугар эргиллээт уйулҕа кэбиниэтин арынна», – диэн кэпсээтэ Елена Волкова.