Баһаартан сэрэхтээх буолуу сезонугар бэлэмнэнэбит

Олохтоох дьаһалтаҕа куорат баһылыгын бастакы солбуйааччы Алексей Корнилов салалтатынан ыксаллаах быһыыны-майгыны сэрэтэргэ уонна суох оҥорорго уонна баһаартан сэрэхтээх буолууга хамыыһыйа мунньаҕа буолла. Мунньахха 2022 сылга техногеннай баһаардар тахсыыларын сэрэтиини, халаан уутун куттала суох ыытыыны уонна  баһаартан сэрэхтээх буолуу сезонугар бэлэмнэниини дьүүллэстилэр. Бу туһунан Олохтоох дьаһалта пресс-сулууспата иһитиннэрдэ.
Мунньахха Олохтоох дьаһалта гражданскай оборонаҕа уонна ыксаллаах быһыыга-майгыга Управлениетын исписэлиистэрэ, ИДьМ, ЫБММ, Дьокуускай куорат хонтуруоллуур уонна салайар территориальнай уорганнарын бэрэстэбиитэллэрэ кытыннылар. 
Дьүүллэһии түмүгүнэн куорат иһинээҕи уонна таһынааҕы уокуруктарга нэһилиэнньэни кытта баһаары сэрэтэр үлэни салгыыр быһаарыы ылылынна. Ураты болҕомто элбэх оҕолоох ыалларга уонна социальнай көмүскэлэ суох категорияҕа киирсэр гражданнарга ууруллуоҕа. Сэрэтэр эриэйдэлэри ыытыы таһынан техногеннай баһаардары таһаарбат сыаллаах уонна олорор секторга, тэрилтэлэргэ уонна эбийиэктэргэ баһаартан сэрэхтээх буолууну күүһүрдэр үлэҕэ чопчу этиилэри оҥоруохтара. Куорат таһыгар уонна киинигэр уопсастыбаннай тырааныспарга баһаартан сэрэтэр сыаллаах, баһаар уонна халаан уутун кэмигэр хайдах сөпкө дьаһанар туһунан тематическай баннердар уонна өйдөбүнньүктэр ыйаныллыахтара. 
2022 сыл муус устар 30 күнүттэн балаҕан ыйын 25 күнүгэр диэри патруллуур-хонтуруоллуур бөлөх Дьокуускай территориятыгар нэһилиэнньэ маассабайдык сынньанар  уонна бултуур сирдэригэр эриэйдэлэри ыытыаҕа. Итини сэргэ, кулун тутар ыйга саҕаламмыт хамаанданан-штабынан ыытыллар баһаар уонна халаан усулуобуйаларыгар практическай үөрэх салҕанар.