Бүгүн 100 киһи коронавирустаата

Ыам ыйын 23 күнүнээҕи туругунан, Суһал штаб иһитиннэрбитинэн, өрөспүүбүлүкэ үрдүнэн бүтэһик сууккаҕа 100 киһи коронавирустаата. 76 киһи Дьокуускайга. Ол аата уопсайа коронавируһунан ыалдьыбыт дьон ахсаана 1117 буолла, олортон 503 үтүөрбүт, 6 киһи суорума суолламмыт.

Билигин карантиҥҥа олорор Нам улууһун Салбаныгар 40-ча ыалдьыбыт киһи баара бэлиэтэнэр. Саастаахтар уонна араас ыарыылаахтар Дьокуускайга, Намҥа эмкэ киирдилэр.

“Ыалдьыбыт дьон уопсай ахсааныттан 176-та оҕолор. Ыам ыйын 12 күнүгэр хааччахтар сымнаабыттарын кэннэ, халлаан сайыҥҥылыы сылыйан дьон бэйэ изоляциятын тутуспат буолан барда. Уопсастыбаннай транспорынан элбэх киһи айанныыр, болуоссаттарга, балаһааккаларга дьаарбайа тахсар киһи элбээтэ”, - диэн Ил Дархан Айсен Николаев брифинигэр кэпсээтэ.

Дьокуускайга булгуччулаах мааска кэтии эрэсиимэ киирдэ. Оптуобуска, маҕаһыыҥҥа мааската суох дьону киллэриэ да суохтаахтар.