Атыы-эргиэн кииннэрэ сабыллаллар, оптуобус сырыыта аҕыйыыр...

Коронавирус тарҕаныытын уодьуганныыр өрөспүүбүлүкэтээҕи штаб мунньаҕа буолан ааста. Ол түмүктэрин Ил Дархан Айсен Николаев, Дьокуускай баһылыга Сардаана Авксентьева уонна өрөспүүбүлүкэ кылаабынай санитарнай бырааһа Маргарита Игнатьева брифиннэригэр кэпсээтилэр:

Ол курдук, бу кэлэр субуотаттан аныгыскы бэнидиэнньиккэ, ол аата муус устар 6 күнүгэр диэри Саха сирин үрдүнэн атыы-эргиэн кииннэрэ, фитнес саалалар, косметология салоннара, туристическай базалар о.д.а. барыта сабыллар. Ас-үөл уонна киһи олоҕор уһулуччу наадалаах табаардары атыылыыр маҕаһыыннар эрэ үлэлэрэ тохтообот. Кытаанах ирдэбиллэри чопчулуур Бэрэсидьиэн Укааһа бу сотору кэминэн тахсыаҕа.

“Ыарыы тарҕаныыта дьонтон бэйэтиттэн быһаччы тутулуктаах. Төһө кыалларынан уопсастыбаннай сирдэргэ мустумаҥ, дьиэҕитигэр олоруҥ”, -диэн Айсен Николаев тоһоҕолоон эттэ.

Куорат баһылыга Сардаана Авксентьева иһитиннэрбитинэн, Дьокуускайга олох-дьаһах коммунальнай хаһыыйыстыба уонна суһал үлэни хааччыйар сулууспалар бары үлэлээбиттэрин курдук үлэлиэхтэрэ. Оптуобус сырыыта аҕыйыаҕа – сарсыарда 8 чаас уонна киэһэ 5 чаас икки ардыгар 1-дии чаас быыһылаан сылдьыахтара. Сарсыарда уонна киэһэ үлэҕэ барыыга-кэлиигэ оптуобус ахсаана эбиллэн биэриэҕэ диэн мээр иһитиннэрдэ. “Куораппытыгар аһы-үөлү, наадалаах табаары онлайн тириэрдэн биэрэр сулууспалар бааллар. Төһө кыалларынан бу сулуупалар өҥөлөрүнэн туһана сатааҥ, бэйэҕитин харыстаныҥ”, - диэтэ куорат баһылыга.  

Өрөспүүбүлүкэ кылаабынай санитарнай бырааһа Маргарита Игнатьева этэринэн, “самоизоляция” эрэһиимэ ыарыыны уодьуганныырга төһүү күүс буолар миэрэ.