Алампа бириэмийэтин кыайыылаахтара билиннилэр
Сэтинньи 14 күнүгэр, саха уус-уран литературатын, бэчээтин төрүттэһээччи, прозаик, драматург, поэт, тылбаасчыт, саха тыйаатырын бастакы дириэктэрэ Анемподист Иванович Софронов-Алампа төрөөбүт күнүгэр, кини аатынан бириэмийэни култуура уонна искусство деятеллэригэр туттардылар диэн Өрөспүүбүлүкэ баһылыгын уонна бырабыыталыстыбатын пресс-сулууспата иһитиннэрдэ.
Үбүлүөйдээх бэһис тэрээһин П.А. Ойуунускай аатынан Саха академическай тыйаатырыгар ыытылынна.
«Быйыл кыайыылаахтары 10 номинациянан сүүмэрдээтилэр. Номинациялар Анемподист Софронов ханнык хайысхаҕа бастыҥын көрдөрөллөр. Сылын аайы суруйааччы 9 саҥа олоҕун чахчытын булабыт уонна киэҥ араҥаҕа таһаарабыт. Бүгүҥҥү күҥҥэ 45 итинник чахчы баара биллэр», - диэтэ Олонхо тыйаатырын салайааччыта Мария Турантаева.
Быйылгы лауреаттар ааттара:
«Уран тыл» – литературовед, филологическай наука доктора, ХИФУ профессора Варвара Окорокова;
«Кылаан дьүрүскэн айааччы» – Николай Михеев;
«Өрөгөйдөөх өйөөччү» – «Арктик Капитал» хампаанньа төрүттээччитэ Матвей Евсеев;
«Дэгиттэр режиссёр» – Саха академическай тыйаатыр режиссера Сергей Потапов;
«Чаҕылхай артыыс» – Саха академическай тыйаатыр артыыһа Иннокентий Луковцев;
«Чаҕылхай артыыска» – Олонхо тыйаатырын артыыската Нюргуяна Маркова;
«Ырыа айааччы» – Иван Туласынов;
«Дархан ойууһут» - Александр Манжурьев;
«Киинэ эйгэтин чыпчаал үлэһитэ» – Иннокентий Сивцев;
«Алампаҕа сүдү бэриниилээх» – Ем. Ярославскай аатынан музей Чөркөөхтөөҕү филиалын сэбиэдиссэйин эбээһинэһин толорооччу Михаил Протодьяконов.
Кыайыылаахтарга маастар Николай Чоччасов оҥорбут статуэткаларын туттардылар.
Сонуннар
Ордук ааҕаллар
