АГАТУ быйыл тыһыынчаттан тахса бүддьүөт миэстэлээх

Арассыыйа бырабыыталыстыбата сылын аайы үрдүк үөрэх кыһаларыгар бүддьүөт миэстэтин элбэтиини үбүлүүр. Арктическай судаарыстыбаннай агротехнологическэй университекка 2022 сылга босхо миэстэ 15,37 % үрдүүр диэн АГАТУ пресс-сулууспата иһитиннэрдэ.
«Быйылгы үөрэх дьылыгар бүддьүөт миэстэтигэр 1067 эдэр дьон киириэхтэрин сөп, ити былырыыҥҥытааҕар 164 миэстэнэн элбэх. Бырабыыталыстыба ылынар миэрэлэрэ омук сириттэн кэлэр табаардары солбуйарга туһуламмытын өйдүүр буоламмыт, регион уратытын учуоттаан, агропромышленнай комплекс исписэлиистэрин үөрэтэн таһаарарга бэлэммит. Бүддьүөт миэстэтин элбэтии регион каадырынан хааччыллар боппуруоһун быһаарарга көмөлөһүөҕэ. Бүгүҥҥү күҥҥэ өрөспүүбүлүкэ улуустара технологтарга, зоотехниктарга, агрономнарга наадыйаллар. Былырыын «Информационные системы и технологии» хайысхаҕа киирэ сатааччы элбэҕэ. Билигин абитуриеннар агроинженер, АПК эйгэтигэр экономист, землеустроитель уонна кадастровай инженер идэлэрин талаллар. РФ Бырабыыталыстыбатын ылынар миэрэлэрэ, дойдубут экэниэмикэтин тутар үрдүк квалификациялаах каадырдары иитэн таһаарарга туһуламмыттар», - диир университет ректорын эбээһинэһин толорооччу Валерий Федоров.
Арктическай судаарыстыбаннай агротехнологическэй университекка үөрэххэ киирии хампаанньата бэс ыйын 15 күнүттэн саҕаланар.