23.03.2024 | 10:00

Рулет арааһын астыахха

Бүгүн ааҕааччыларбытыгар астыырга чэпчэки уонна судургу, ол эрээри олус минньигэс уонна тотоойу сокуускалар ырысыаптарын бэчээттиибит. Бырааһынньыктааҕы сандалыгытын киэргэтиэхтэрэ, өрөбүллэргэ сонун бүлүүдэ буолуохтара.
Рулет арааһын астыахха
Ааптар: Айыына КСЕНОФОНТОВА
Бөлөххө киир

Лаваштан эриллибит эттээх рулет

Эһиэхэ наада:

- 300 г чараас лаваш;

- 550 г эриллибит эт (сибиинньэ, ынах, куурусса да буолуон сөп);

- 1 уст. эриэппэ луук;

- 2 уст. сымыыт;

- туус, биэрэс – бэйэ сөбүлүүрүнэн.

Астааһына:

Эриэппэ луугу ыраастаан, бытархай гына кырбыыбыт. Ону эриллибит эккэ биир сымыыты кытта холбоон кутабыт, туус, биэрэс эбэбит уонна үчүгэйдик булкуйабыт.

Туспа иһиккэ хаалбыт сымыыты алдьатан, биир кэлим маасса буолуор диэри биилкэнэн булкуйабыт. Онтон лавашпытын тэлгээн, ону сымыытынан сыбыыбыт, ол кэннэ үрдүгэр өссө биир лиис лаваһы тэлгээн, эмиэ ити курдук сыбыыбыт (лаваш кытыыта бэрт түргэнник хатар, ол иһин сып-сап туттууну эрэйэр).

Салгыы лавашпыт үрдүгэр эти тарҕаччы кутабыт, онтон рулет курдук чиккэччи эрийэбит. Духуопкабытын 180 кыраадыс итиигэ холбоон бэлэмниибит.

Рулеппытын туора быһабыт, сымыыппыт тобоҕунан таһын сыбыыбыт. Онтон тимир лиискэ пергамент тэлгээн баран уурабыт.  

180 кыраадыс итии духуопкаҕа 25 мүн. буһара уурабыт. Таһаарыахпыт 5 мүн. иннинэ өссө биирдэ сымыытынан сотобут, оччоҕуна рулеппыт саһархай уонна таһа хачыгырас буолуоҕа.

Бэлэм рулеты тэҥ гына бысталыыбыт уонна остуолга уурабыт.

Кууруссаттан рулет

Итиилии да, тымныылыы да сииргэ үчүгэй. Фольгаҕа суулаан баран, айылҕаҕа тахсарга илдьэ барыахха сөп.

Эһиэхэ наада:

- 600 г куурусса куҥ этэ (филе);

- 150 г кытаанах сыыр;

- петрушка – бэйэ сөбүлүүрүнэн;

- 3 ост.нь. майонез;

- туус, биэрэс, укуруоп, петрушка  – бэйэ сөбүлүүрүнэн.

 

Астааһына:

Икки улахан филени ылар ордук. Эти сууйан, тириитин, иҥиирин, силгэтин ылан быраҕабыт, ортотунан хайытабыт уонна тэнитэбит. Онтон ас пленкатынан бүрүйэн баран куукунаҕа туттуллар анал сүгэнэн сынньабыт. Туустаан, биэрэстээн баран, кытыыларын бэйэ-бэйэлэригэр сыһыары тутан уурабыт.

Эти майонеһынан сыбыыбыт. Үрдүгэр бытархай гына түөркэлэммит сыыры уонна укуруобу, петрушканы кыра гына кырбаан, тарҕаччы кутабыт. Онтон рулет курдук сэрэнэн эрийэбит, начыынын тохпот буола сатыыбыт. Ол кэннэ фольгаҕа суулаан баран, 220 кыраадыс итии духуопкаҕа 25-30 мүн. буһара уурабыт. Таһаарыахпыт 5-10 мүн. иннинэ фольгабытын арыйабыт, оччоҕуна рулеппыт саһарчы буһуоҕа.

Рулеппытын сойутан баран бысталыыбыт. Итии эрдэҕинэ таһын майонеһынан эбэтэр араас соуһунан сотуохха сөп.   

Араҥалаах рулет

Эһиэхэ наада:

- 275 г араҥалаах (слоенай) тиэстэ;

- 150 г кытаанах сыыр;

- 150 г халбаһы;

- 1 уст. помидор;

- 1 уст. эриэппэ луук;

- 1 ост.нь. мас арыыта (эбэтэр ынах арыыта);

- 1 уст. сымыыт;

- 1 ч.нь. кунжут;

- туус, биэрэс, тума  – бэйэ сөбүлүүрүнэн.

Астааһына:

Араҥалаах тиэстэни, тоҥ буоллаҕына, эрдэ таһааран ириэрэбит. Луугу, помидору сууйан, ыраастаан, куурдан баран бытархай гына кырбыыбыт. Хобордооххо арыы кутан сылытабыт уонна луукпутун саһарыар диэри ыһаарылыыбыт. Онно помидору кутан, туус, тума эбэбит. Помидор уута уолуор диэри күүстээх уокка буһарабыт. Онтон бэлэм соуспутун сойута уурабыт.

Духуопкабытын 180-200 кыраадыс итиигэ холбоон бэлэмниибит. Халбаһыны бөдөҥ гына түөркэлиибит эбэтэр соломолуу быһабыт.

Тиэстэни остуолга тэлгээн, бэйэбит оҥорбут соуспутунан сыбыыбыт. Салгыы халбаһыны тарҕаччы кутабыт, ол үрдүгэр – түөркэлэммит сыыр. Начыыннаах рулеппытын сэрэнэн эрийэбит уонна сытыы быһаҕынан 2 см халыҥ гына бысталыыбыт.

Сымыыты биир кэлим маасса буолуор диэри венчигинэн ытыйабыт. Тимир лиискэ пергамент кумааҕыны тэлгэтэн, онно рулеттарбытын уурталыыбыт уонна үрдүлэрин сымыытынан сыбыыбыт, силиконовай киистэнэн туттар үчүгэй. Рулет үрдүгэр кунжут табыгынатабыт.

180-200 кыраадыс итии духуопкаҕа саһарыар диэри буһарабыт.

Блиныттан рулет

Эһиэхэ наада:

Блины тиэстэтигэр:

- 500 мл үүт;

- 1 ост.нь. саахар;

- 1 сымыыт;

- 2 ост.нь. майонез;

- 2 ост.нь. мас арыыта;

- 0,5 ч.нь. суода;

- 1,5 ыст. бурдук.

Начыыныгар:

- 150 г лосось (кыра туустаах);

- 150 г творожнай сырок;

- 2 уст. буспут хортуоппуй;

- 1 ч.нь. хартыыһа ;

- 1 г күөх луук;

- 50 г кыһыл искэх;

- туус, биэрэс – бэйэ сөбүлүүрүнэн.

 

Астааһына:

Блиныны бу эбэтэр атын ырысыабынан астыаххытын сөп.

Буспут хортуоппуйу сойутан баран бытархай гына түөркэлиибит. Дириҥ миискэҕэ творожнай сыыры уонна хартыыһаны холбоон булкуйабыт. Балыгы чараас гына бысталыыбыт.

Салгыы блиныбытын начыынынан толоробут. Бастаан сыырдаах маассанан чараас гына сыбыыбыт, ол үрдүгэр түөркэлэммит хортуоппуйу биилкэнэн баттыы-баттыы тарҕаччы уурабыт, туус, биэрэс табыгынатабыт. Блины кытыытыгар балыкпытын уурабыт уонна ортотугар күөх луугу уонна кыһыл искэҕи эбэбит (хаартысканы көр), ол кэннэ рулет курдук эрийэбит. Холодильникка 40 мүн. туруорабыт. Онтон бысталаан, тэриэлкэҕэ уурталыыбыт.

Эриллибит балыктан рулет

Эһиэхэ наада:

- 700 г эриллибит балык;

- 4 уст. сымыыт;

- 250 г эриэппэ луук;

- 100 г ынах арыыта;

- 160 г моркуоп;

- туус, биэрэс, тума  – бэйэ сөбүлүүрүнэн;

- 30 г сүөгэй;

- күөх үүнээйи – бэйэ сөбүлүүрүнэн.

 

Астааһына:

Үс сымыыты бүтэйдии буһаран баран сойутабыт.

Эриллибит балыгы бэйэ сөбүлүүрүнэн туустуубут, биэрэстиибит (атын туманы эбиэххэ сөп). 

Луугу, моркуобу ыраастаан, сууйан куурдабыт. Онтон моркуобу бөдөҥ гына түөркэлиибит, луугу бытархай гына кырбыыбыт.

Хобордооххо ынах арыытын уулларабыт, орто уокка моркуобу, луугу саһарыахтарыгар диэри ыһаарылыыбыт. Сойбутун кэннэ балыктаах миискэбитигэр эбэбит, онно биир сымыыты алдьатан кутабыт уонна үчүгэйдик булкуйабыт.

Духуопкабытын 200 кыраадыс итиигэ холбуубут.

Остуолга фольга тэлгиибит уонна онно балыктаах маассабытын тэҥ гына тарҕатан уурабыт, быһыыта көнө муннук буолуохтаах. Онтон биир кытыытыгар буспут, хахтаммыт сымыыттары уурабыт уонна рулет курдук эрийэбит. Кытыыларын чиккэччи тардабыт. 

Фольгаҕа сууламмыт рулеппытын духуопкаҕа 30 мүн. буһарабыт. Фольгатын арыйан, кыратык сойутабыт. Онтон үрдүгэр сүөгэй кутан, күөх үүнээйинэн киэргэтэбит. 

Сымыыттан сыырдаах, оҕуруот астаах рулет

Эһиэхэ наада:

- 200 г хаппыыста;

- 2 уст. помидор;

- 0,5 болгар биэрэһэ;

- 0,5 эриэппэ луук;

- 70 г кытаанах сыыр;

- 2 ост.нь. мас арыыта;

- 30 г сүөгэй;

- туус, укуруоп, паприка, мэлиллибит хара биэрэс – бэйэ сөбүлүүрүнэн.

 

Астааһына:

Хаппыыстаны синньигэс гына соломолуу быһабыт, онно 1 ост.ньуоска паприка, мэлиллибит биэрэс, туус кутан булкуйабыт. Онно сыыры бытархай гына түөркэлиибит уонна булкуйабыт.

Болгар биэрэһин соломолуу быһабыт. Эриэппэ луугу кырбыыбыт. Хаппыысталаах иһиккэ укуруоп эбэбит уонна үчүгэйдик булкуйабыт. Помидору наһаа бытархайа суох гына кырбыыбыт.

Бу кэмҥэ хобордооххо 2 ост.нь. мас арыытын кутан, сылыта уурабыт.

Туспа иһиккэ сэттэ сымыыты алдьатан, туус, биэрэс табыгынатан баран, биир кэлим маасса буолуор диэри ытыйабыт. Онтон итии хобордооххо сымыыт аҥаарын блины курдук кутабыт. Буһан эрдэҕинэ хаппыысталаах начыыммытын блиныбыт аҥаарыгар диэри кутабыт. Онно болгар биэрэһин, помидору уонна луугу эбэбит, рулет курдук эрийэбит. Үрдүгэр сымыыт маассатын кутабыт. Онтон буһан эрдэҕинэ эмиэ рулет курдук эрийэбит. 

Сонуннар

Ордук ааҕаллар

Сири иилии эргийиэм!
Дьон | 12.04.2024 | 18:00
Сири иилии эргийиэм!
Кэбээйи Арыктааҕыттан төрүттээх Иннокентий Ноговицын бэлисипиэтинэн аан дойдуну биир гына айанныыр хоббилааҕын туһунан хас да сыллааҕыта суруйан турабыт. Иннокентий киһини кытта кэпсэтэригэр элбэх ууну-хаары эрдибэккэ, аҕыйах тылынан чуо ыйытыыга эрэ хоруйдуурун  билэр буоламмын, Кытайга тиийбититтэн саҕалаан, бассаабынан элбэх да элбэх ыйытыыларбынан көмөн туран, наадалаах информациябын хостоон ыллым. Кинини ыра санаатын...
Зоя Желобцова:  «Олох толору үөрүүтүн, кэрэтин билэн сылдьабын»
Дьон | 11.04.2024 | 10:00
Зоя Желобцова: «Олох толору үөрүүтүн, кэрэтин билэн сылдьабын»
«Үчүгэй киһи» диэн хайдах киһини ааттыылларый? Арааһа, бастатан туран, дьоҥҥо эйэҕэс, аламаҕай, үөрэ-көтө сылдьар, барыга-бары кыһамньылаах, үлэһит киһини ааттыыр буолуохтаахтар. Дьэ, оччотугар, биһиги дьүөгэбит Зоя Константиновна Желобцова онуоха сүүс бырыһыан эппиэттэһэр. Киһи киһитэ буоллаҕа биһиги Зоябыт!   Оттон киһи барахсан мутугунан быраҕар муҥур үйэтигэр дьонугар-сэргэтигэр, ыччаттарыгар хайдах суолу-ииһи, ааты, өйдөбүлү хаалларара...
«Доҕордоһуу» — оҕо саас ыллыга
Сонуннар | 11.04.2024 | 18:00
«Доҕордоһуу» — оҕо саас ыллыга
Бу күннэргэ өрөспүүбүлүкэҕэ бастакынан тэриллибит “Доҕордоһуу” оҕо үҥкүү норуодунай ансаамбыла 55-с сылын бэлиэтээтэ. Өрөспүүбүлүкэ үҥкүүтүн эйгэтигэр суолу тэлбит ансаамбыл үөрүүлээх тэрээһинин туһунан санаа атастаһыыларын ааҕыҥ.
Нэһилиэстибэ тула
Тускар туһан | 11.04.2024 | 12:00
Нэһилиэстибэ тула
Киһи бу олохтон барыыта, ыал арахсыыта, төрөппүтэ суох хаалыы – орто дойду сокуоннара. Онуоха биһиги сорох ардыгар хойутаан нэһилиэстибэни оҥотторор түгэммит баар. Өскөтүн кэргэниҥ, ийэҥ, аҕаҥ, чугас киһиҥ суох буоллаҕына, кини нэһилиэстибэтин алта ыйынан сокуонунан оҥотторуохтааххын.   Билэр чугас дьонум аҕалара орто дойдуттан барбытын кэннэ хас да сыл буолан баран биирдэ...