Дьокуускай куораттан тоҕус үөрэнээччи Бүтүн Арассыыйатааҕы олимпиадаҕа кытта барар

Саха сириттэн 17, ол иһигэр Дьокуускай куораттан 9 үөрэнээччи Бүтүн Арассыыйатааҕы олимпиада түмүктүүр түһүмэҕэр ыҥырыыны туттулар.

Бүтүн Арассыыйатааҕы үөрэнээччилэр олимпиадалара быйыл кулун тутар 18 күнүттэн ыам ыйын 3 күнүгэр диэри Арассыыйа 12 куоратыгар ыытыллар – Москва, Аллараа Новгород, Самара, Саранскай, Ставрополь, Казань, Уфа, Салехард, Псков, Ульяновскай, Воронеж уонна Сочи.
Ол курдук, Арассыыйа таһымнаах олимпиада түмүктүүр түһүмэҕэр Дьокуускай куорат Классическай гимназиятыттан саамай элбэх, 4 үөрэнээччи кыттар чиэскэ тигистэ, В.П. Ларионов аатынан Физико-техническэй лицейтэн – 2 үөрэнээччи, Куорат лицейиттэн, 26 №-дээх уонна Б.А. Горбатюк аатынан 15 №-дээх оскуолалартан – биирдии үөрэнээччи.
Ол курдук, дириҥ билиилэринэн уонна үөрэххэ дьаныардарынан Дьокуускай куорат эрэ буолбакка, бүтүн Саха Өрөспүүбүлүкэтин чиэһин көмүскүөхтэрэ: французскай тылга – Максим Евсеев, Классическай гимназия 9-с кылааһын үөрэнээччитэ; историяҕа – Рената Хабибуллина, 26 №-дээх оскуола 11-с кылааһын үөрэнээччитэ; немец тылыгар – Сергей Зарубин, Классическай гимназия 11-с кылааһын үөрэнээччитэ; экономика – Леонид Овсянников, В.П. Ларионов аатынан Физико-техническэй лицей 9-с кылааһын үөрэнээччитэ; право – Екатерина Белкина, Б.А. Горбатюк аатынан 15 №-дээх оскуола 10-с кылааһын үөрэнээччитэ; химия – Кирилл Степанов, В.П. Ларионов аатынан Физико-техническэй лицей 10-с кылааһын үөрэнээччитэ; экология – Елена Ефимова, Классическай гимназия 11-с кылааһын үөрэнээччитэ; экология – Анастасия Карпова, Классическай гимназия 11-с кылааһын үөрэнээччитэ.
Дьоһун түһүлгэҕэ өрөспүүбүлүкэҕит уонна куораккыт аатын чиэстээхтик билиһиннэрэргитигэр, ситиһиилэри баҕарабыт, диэн иһитиннэрэр Үөрэх управлениетын пресс-сулууспата.