Бырааһынньык салҕанарын модьуйабын!

“Иван Грозный меняет профессию” диэн киинэҕэ бырааһынньыгы салгыыры модьуйалларын курдук, биһиги, Арассыыйа олохтоохторо, аһыырбытын, астанарбытын сөбүлүүбүт. Бүгүн мин үгэс курдук бэйэм сөбүлээн астыыр, бэрэбиэркэни ааспыт бүлүүдэлэрбин ааҕааччыларбар билиһиннэриэм. Бырааһынньыктар өссө да иннибитигэр эбээт!

Глухариное гнездо

Ханнык баҕарар остуолу киэргэтэр, торду да солбуйар олус минньигэс бүлүүдэ. Кини араас ырысыаптаах, хас биирдии хаһаайка бэйэтэ туһунан кистэлэҥнээх. Төһө баҕарар сакалаатынан да, присыпкаларынан да киэргэтиэххэ сөп.

Туох наадата:

2 сымыыт;

1 ч. нь. сода;

1 ост. нь. мүөт;

1 ыстакаан саахар;

2 ыстакаан бурдук.

Астааһына:

Барытын булкуйан, миискэҕэ кутан баран, сымнаҕас тиэстэ буолуор диэри миксеринэн ньыһыйаҕыт. 180 кыраадыстаах итии духуопкаҕа 10-15 мүнүүтэ буһараҕыт. Сойбутун кэннэ тэриэлкэҕэ өрөһөлүү, хайалыы ууран баран, чөчөгөйү кытта саахар булкуйан крем кутаҕыт, ол кэннэ киэргэтэҕит.

Ананастаах креветкэ

Туох наадата:

3 устуука сымыыт;

Бааҥка аҥаара ананас хомпуот;

2 өлүүскэ чеснок;

250 гр креветкэ;

100 г сыыр.

Астааһына:

Бу олус интэриэһинэй, минньигэс салаат. Барытын кубиктыы кырбаан баран холбуугут уонна майонез кутан баран сиигит.

“Сливочка” салаат

3 помидор;

6-8 бөдөҥ слива;

Кыһыл луук аҥаара;

Петрушка, базилик.

Соус: 4 ост. нь мас арыыта + 2-3 ост. нь. соевай соус + 1 ч. нь. мүөт.

Астааһына:

Бу астыырга олус судургу салаат. Мин кэнники буһарыллыбат, ыллыҥ да астаан киирэн барар салааттары талар буоллум. Бу салааты оруобуна төһө, хачча ыйыллыбытынан оҥорбутум. Арай, кыһыл луук оннугар маҥан эриэппэ луугу куппутум.a

Духуопкаҕа ойоҕос

Дойдубуттан кэлбит саһархай сыалаах эмис ойоҕоһу оруобуна Ороһооспо күн буһардым. Тарбаахаптыы диэн.

Туох наадата:

Убаһа ойоҕоһо;

Хартыыһа;

2 ост.нь. сүөгэй (кыра бырыһыаннаах);

1 ост.нь. бурдук;

Туус, хара биэрэс;

1 устуука сымыыт.

Астааһына:

Ойоҕоспутун хартыыһанан, тууһунан чараастык сотон баран уон мүнүүтэ туруорабыт. Онтон сүөгэйгэ бурдук, сымыыт, туус, биэрэс кутан баран убаҕас тиэстэ курдук оҥорон ойоҕоспутугар кутабыт, барытын сотобут. 200 кыраадыска тиийэ күүскэ итийбит дохуопкаҕа ойоҕоспутун угабыт, 20-чэ мүнүүтэ эрэ буһарабыт, биэс-хас мүнүүтэ иннинэ уоппутун 150 диэри кыччатабыт. Остуолга туох да хаалбат гына сиэниллэр!

Ороһуоспа салаата

Туох наадата:

200 г куурусса этэ;

1-2 оҕурсу;

Чернослив;

4-5 сымыыт.

Астааһына:

Куурусса куҥ этин, сымыыты ууга буһарабыт, черносливы сууйан баран эрдэттэн сылаас ууга сымната уурабыт. Барытын кубиктыы кырбаталаан баран майонез кутан булкуйабыт. Эмиэ ураты амтаннаах салааты Ороһуоспа күн астаабытым.

«Дракон уота» салаат

Бу салааты саҥа дьылы көрсөр күҥҥэ астаммытым. Аата да этэрин курдук, кэлбит сылбытыгар барсар диэн анаан талбытым.

Туох наадата:

400 г ынах этэ;

1 бааҥка горох;

4 помидор;

3 оҕурсу;

2 болгарскай биэрэс;

1 тутум кинза;

1 өлүүскэ чеснок;

Бытархай кыһыл биэрэс, паприка, кориандр, 4 ост. нь. соевай соус, мас арыыта.

Астааһына:

Барыта уһун-синньигэс гына кырбанар, чеснок илдьиритиллэр, кинза бытархайдыы кырбанар. Салаат иһитигэр кутуллар уонна атын этиллибити кытта булкуйуллар.

Манна бэйэм көрүүлэрбин этиэхпин баҕарабын. Бу дьиҥнээх суруллубут ырысыабы биэрдим. Мин астыырбар кинилэр эппиттэриттэн арыый уларытабын, сороҕор маҕаһыыҥҥа суох да буолуон сөп. Уонна, биллэн турар, остуолга төһө киһи баарыттан тутулуктаах.

Салааты сиэн баран бары сөбүлээтибит, мин ынах этин оннугар убаһа этин ыһаарылаабытым. Горох кутумуохха да сөп эбит дии санаатым, помидорум икки устуука этэ, оҕурсум икки, биэрэһим биир, ол оннугар соевайы элбэппитим. Уопсайынан, саха хараҕа диэн баар, харахха көрөн, астыыр иһитиҥ, төһө киһи кэлиэхтээҕэ барыта учуоттанар. Ону хаһаайка эрэ үксэ билэр буолуохтаах. Онон, бу салааты элбэх киһини ыҥырар түгэҥҥэ суруллубуту барытын ахсаанынан куттахха буолунай элбэх, бэрт үчүгэй салаат тахсар.

Мимоза

Туох наадата:

Биир хаа крабовай палочка;

3-4 сымыыт;

100 г сыыр;

1 луук;

2 дьаабылыка эбэтэр хортуоппуй.

Астааһына:

Манна сымыыты эрэ буһарабыт уонна араҥанан уурабыт. Крабовай + луук + дьаабылыка + сымыыт + сыыр. Икки ардын барытын майонезтыыбыт.

Бу салааты биһиги аймах бары сөбүлүүбүт. Ырысыап илииттэн илиигэ барар. Хортуоппуйу хаһан да куппатаҕым, дьаабылыката барсар. Саамай минньигэс, уулаах-хаардаах Краснодарскай суорду сөбүлээн ылабын. Төһө да иһити оҥордорбут, туох да ордубат. Араҥаны оҥорорго ытыскынан лэппэтэн, сыһыаран иһиэххэ наада, оччоҕо майонез сыбанара да ордук буолар. Арба, луугу эрэ кубиктыы кырбыыбын уонна барытын теркалаан кэбиһэбин.

Биирдэ эмит бэрэскилиир дьоҥҥо эдьиийбиттэн Розалияттан туһалаах этии:

600 г ууга – 37 устуука, 700 г ууга 45 устуука бэрэски оҥоһуллар.

Манна, биллэн турар, бэрэскиҥ кээмэйиттэн ахсаана кыратык уларыйыан сөп.