Минньигэстик аһааҥ

Французтуу ыһаарыламмыт дьаабылыка

Дьаабылыка  — 250-300 г;

Бурдук  — 60 г;

Саахар  — 15 г;

Лимон сүмэһинэ — 1 ост.нь.;

Ынах арыыта  — 60 г;

Оливка арыыта — 30 г.

Французтар минньигэс уонна судургу бүлүүдэлэрэ. Десерт быһыытынан бары сөбүлүөхтэрэ. Ону тэҥэ ыһаарыламмыт дьаабылыканы күөрчэххэ, мороженайга, блиныга, сырникка, алаадьыга эбии гыныахха сөп.

Дьаабылыкабытын сууйабыт, кураанах гына сотобут, өлүүскэлэргэ арааран кырбастыыбыт. Иһиккэ кутан бурдукка булкуйабыт.

Хобордооххо ынах арыытыгар оливка арыытын эбэн сылытабыт. Дьаабылыкабытын онно икки өттүттэн 2-лии мүнүүтэ ыһаарылаан ылабыт.

Ыһаарыламмыт дьаабылыка үрдүгэр лимон сүмэһинин ыгабыт, саахар таммалатабыт.

Үүккэ буспут саахар

Үүт – 1 ыст.;

Саахар – 3,5 ыст.;

Арахис – 1 ыст.;

Ынах арыыта – 80 г.

Ханнык да кэмпиэттээҕэр ордук ас буолан тахсар, чэйи уонна кофены кытта ааттаах. Оҕо да, улахан да дьон сөбүлүөхтэрэ.

3 ыстакаан саахарга үүппүтүн кутабыт уонна кыра уокка сылыта туруорабыт. Сөп буола-буола сыстыбатын диэн булкуйан иһэбит.

Ол кэмҥэ арахиспытын кураанах хобордооххо кыратык ыһаарылаан ылыахтаахпыт.

Отучча мүнүүтэнэн биир кэлим маасса буолан буһан тахсар.

Ыстакаан аҥаара саахар хаалбытын кураанах хобордооххо кутан уулларабыт. Уонна онно маассабытын кутабыт. Ынах арыытын эбэбит.

Булкуйа туран өссө 2-3 мүнүүтэ буһаран ылабыт.

Пергамент кумааҕынан тэлгэммит формаҕа арахиспытын тэнитэ кутабыт, үрдүгэр маассабытын кутабыт, тэнитэбит.

Холодильникка сойутабыт. Сойбутун кэннэ хайдах баҕарарбытынан быһыылаан кырбастаан кэбиһэбит.

Клюквалаах мусс

Мааннай куруппа – 0,5  ыст.;

Саахар – 3 ост. нь.;

Клюква – 3 ыст.;

Сымыыт үрүҥэ – 2 уст.

Клюкваны сууйабыт, куурдабыт, сиитэ нөҥүө ньыһыйабыт. Клюква ыгыллыбыт сүмэһинигэр 2 ыст. тымныы уу кутабыт, оргутабыт.

Уотун кыччатан баран саахарбытын эбэбит уонна 5 мүнүүтэ буһарабыт.

Атын көстүрүүлэҕэ сиидэлээн ылабыт. Онтубутугар мааннай куруппа эбэн буһарабыт. Хааһыны курдук быыстала суох булкуйа турабыт.

Сымыыт үрүҥүн миксеринэн күүгэн буолуор диэри ытыйан баран мааннай куруппалаах маассабытын кытта холбуубут.

Формаларга кутан биир чаас холодильникка туруора түһэбит.

Халва

Подсолнух сиэмэтэ (семечки) – 1 ыст.;

Бурдук – 1 ыст.;

Саахар – 150 г;

Мас арыыта – 50 мл;

Уу – 5 ост. нь.;

Ванилин.

Халва – илиҥҥи дойдулар минньигэс десертэрэ. Мааннай куруппаҕа, сымыыт үрүҥэр, эриэхэҕэ о.д.а. ньыманан омук аайы атын-атыннык бэлэмнииллэр.

Киһи дьиэтигэр бэйэтэ да оҥостуон сөп эбит. Саамай судургу ырысыабы буллубут – манна температураны тутуһар ирдэммэт, анал прибор наадата суох. Семечканы мясорубкаҕа эрийтэрэҕит, бурдугу кураанах хобордооххо буһараҕыт.

Көстүрүүлэҕэ арыыны, ууну, саахары уонна ванилины холбуубут. 5 мүнүүтэ оргутабыт. Арааран кэбиһэбит.

Семечканы кураанах хобордооххо буһарабыт, онтон мясорубкаҕа иккитэ эрийтэрэбит.

Бурдугу кыра уокка кураанах хобордооххо эриэхэ сыта кэлиэр, саһарыар диэри ыһаарабыт, наар булкуйа туруллуохтаах.

Семечканы кытта бурдукпутун холбуубут, эмиэ мясорубкаҕа эрийтэрэбит. Сылаас сироппутун кутан булкуйабыт, таптайан биэрэбит, сойутабыт.

Банаантан желе

Банаан – 11 уст. (сымнаабыт, харааран эрэр да банан барсар);

Лимон сүмэһинэ – 100 мл;

Саахар – 1,5-2 ыст.;

Желатин – 50 г;

Ынах арыыта – 0,5 ч.нь.

Банааммытын биилкэнэн ньыһыйан пюре оҥоробут. Манна блендери туһаммат ордук, аһара хааһылаан кэбиһэр.

Банаммытын көстүрүүлэҕэ кутабыт, лимон сүмэһинин эбэбит уонна кыратык сылытабыт. Онно желатин уонна ынах арыыта эбэн тэптэрэбит. Уотун кыччатан баран саахардыыбыт, 1 мүнүүтэ эрэ оргутан ылабыт. Быыстала суох булкуйа турдахха сыстыбат.

Формалары ууга сайҕаан ылан баран желебитин кутабыт, сойбутун кэннэ морозильникка уган тоҥоробут.

Остуолга ууруох иннинэ морозильниктан таһааран чаас курдук холодильникка туруоруохха наада. Ханнык да мааны сандалыны киэргэтэр минньигэс десерт буолар.

Ириистэн пудинг

Ириис  - 1 ыст.;

Иэдьэгэй – 150 г;

Сымыыт – 2 уст.;

Саахар – 1 ыст.;

Джем – 8 ч.нь.;

Ынах арыыта – 20 г;

Ванилин.

Пудины кыра-кыра иһиккэ оҥорор табыгастаах. Оҥоһуута бэрт судургу: үөһээ этиллибити барытын бииргэ холбуубут уонна духуопкаҕа буһаран ылабыт.

Бастаан ирииспитин үчүгэйдик сууйабыт, тууһаан баран икки ыстакаан ууга буһарабыт, сойутабыт.

Буспут ирииһи, иэдьэгэйи, саахары, ванилины холбуу ытыйабыт.

Формалары ынах арыытынан биһэн баран бастаан тиэстэбитин, онтон джеми, үрдүнэн эмиэ тиэстэбитин кутабыт.

180 кыраадыска 30 мүнүүтэ буһаран ылабыт. Остуолга уурарбытыгар араас отонунан киэргэтиэххэ сөп.

Клубникаттан щербет

Натуральнай йогурт – 500 мл;

Клубника – 300 г;

Саахар – 200 г;

Уу – 2 ост.нь;

Ваниль.

Клубникабытын сууйан кырбыыбыт. Ууну саахардаан баран онно клубникабытын кутан, хобордооххо буһарабыт.

15 мүнүүтэ буһара түһэн баран сойута уурабыт. Онтон сиидэлиибит, сиидэ нөҥүө ньыһыйабыт.

Сиидэлээбит маассабытыгар йогуртпутун кутабыт. Морозильникка тоҥоробут.

Бастакы икки чаас устата 30 мүнүүтэ буола-буола булкуйан биэрэбит.

Банаантан мороженай

Банаан – 3 уст.;

Үүт – 250 мл;

Саахар – 50 г;

Лимон сүмэһинэ – 1 ост.нь.

Банааммытын кырбаан баран морозильникка тоҥорон ылабыт. Онтон блендеринэн ньыһыйабыт.

Үүтү, саахары, лимон сүмэһинин эбэн булкуйабыт.

Формаларга кутан 5-6 чаас тоҥоробут.

Бэйэҕит баҕаҕытынан үрдүгэр ханнык баҕарар отону, сакалааты үлтүрүтэн эбиэххитин сөп.