Куораты көҕөрдөр үлэни көҕүлүөхтэрэ

Ахсынньы 13 күнүгэр Дьокуускай куораттааҕы Дуума Владимир Аммосов бэрэссэдээтэллээх куораты тутууга уонна архитектураҕа сис хамыыһыйатыгар куорат бүддьүөтүн 2022 уонна 2023-2024 сыллардааҕы былааннаммыт болдьоххо иккис ааҕыытын, тиэргэн территоряларын тупсарыытын, дьиэҕэ чугаһыыр суоллары аспааллааһыны, көҕөрдүү үлэтин тэрийиини уо.д.а. боппуруостары дьүүллэспиттэр. Бу туһунан Дуума пресс-сулууспата иһитиннэрдэ. 
Уокуруктааҕы дьаһалта үпкэ Департаменын начаалынньыга Ольга Максимова киирбит көннөрүүлэри билиһиннэрбит. 
Санатар буоллахха, 2022 сыллааҕы бүддьүөт сүрүн кээмэйэ бүддьүөт икки ардыларынааҕы трансферт кээмэйин учуоттаан туран дохуокка 22 млрд. 40 мөл. солк., ороскуокка 22 млрд. 312 мөл. солк. тэҥнэспит. Бүддьүөт дефицита уларыйбат, бэйэ дохуодун кээмэйиттэн 3%, ол эбэтэр 272 мөл. солк.
Ороскуот чааһыгар, бүддьүөтү көннөрүү хамыыһыйатын боротокуолун кытта сөп түбэһиннэрэн, олохтоох бүддьүөт ороскуотугар уларыйыылар киирбиттэр.   
«Комплексное развитие социальной инфраструктуры городского округа г. Якутск на 2017-2032 годы» муниципальнай бырагыраама олоххо киириитигэр 2022 сылга бүддьүөт икки ардыларынааҕы трансферт сууматын улаатыннарыыга 197, 8 мөл. солк. киирбит.
Куорат уокуругар физическай култуура уонна спорт тэрилтэлэрин сайдыытыгар 273,9 мөл. солк. көрүллүбүт. 
Хатас сэлиэнньэтигэр спортивнай комплекс тутуута былааннаммытынан сибээстээн үбүлээһин кээмэйэ лаппа үрдээбит. Итини таһынан, бассейннаах уонна катоктаах Физкультурнай-чэбдигирдэр  комплекс тутуутугар сир үлэтин ыытыы уонна инженернай ситимнэргэ технологическай холбонуу былааннаммыт. 
«Комплексное развитие транспортной инфраструктуры городского округа г. Якутск на 2017-2032 годы» муниципальнай бырагыраама олоххо киириитигэр, 2022 сыл иккис ааҕыытыгар бүддьүөт икки ардыларынааҕы трансферт кээмэйин чааһыгар 1,2 млрд. солк. суумалаах уларытыы киирбит. 
Бүддьүөт икки ардыларынааҕы трансферт кээмэйин лаппа үрдээһинэ Национальнай бырайыак чэрчитинэн Ленин пр., Можайскай, Труд, Ильменскай, Очиченко, Мархинскай уулусса-суол ситимнэригэр ыытыллар үлэни үбүлээһини кытта сибээстээх.
 «Формирование комфортной городской среды на территории городского округа на 2020-2024 годы» муниципальнай бырагыраамаҕа иккис ааҕыыга бүддьүөт икки ардыларынааҕы трансферт кээмэйин учуоттуур чааһыгар 150 мөл. солк. уларытыы уонна олохтоох бүддьүөт сириэстибэлэригэр 10 мөл. солк. сууманан элбэтии киирбит. Ити сириэстибэлэри уопсастыбаннай миэстэлэри скульптура композициятын туруоран оҥорууга уонна Дьокуускай куорат бастакы бэрэстэбиитэллээх уорганын 200 сылыгар анаммыт «Летопись города Якутска» бырайыак олоххо киирэригэр ыытыахтара. 
Ыйыллыбыт үпкэ 15 тиэргэн территорияларын тупсарары былаанныыллар. Ороскуот кээмэйин үрдээһинэ «Кыайыы Паарката» уопсастыбаннай миэстэни салгыы тупсарыы үлэтин кытта сибээстээх. 
Тиэргэн территорияларын тупсарыыны тэрийиигэ 311,8 мөл. солк. көрүллүбүт.
Ольга Максимова тыл этиитин истэн баран, дьокутааттар кэккэ ыйытыктары биэрбиттэр. Феликс Романов 2022 сылга куораты көҕөрдүүгэ харчы көрүллүүтүн ыйыппыт. Кини көҕөрдүүтэ, үүнээйитэ суох куорат бетон куйаар курдук көстөрүн бэлиэтээбит уонна ити хайысханан үлэ күүһүрэригэр сириэстибэ көрүллэригэр этии киллэрбит. Ити сыалга 10 мөл. солк. кэриҥэ көрүллэр диэн хоруйдаммыт. 
«Ити боппуруос Дьокуускай куорат Уопсастыбаннай сэбиэтин мунньаҕар көрүллүбүтэ, онно туспа структураны тэрийии ороскуоттааҕа этиллибитэ. Ол иһин куораты көҕөрдөр, от-мас олордор үлэһит дуоһунаһын бигэргэтэр туһунан быһаарыы ылыныллыбыта, научнайдык сыһыаннаһан үлэни сүрүннүүр сулууспа баар буолуоҕа», — диэбит «Куорат хаһаайыстыбатын үлэлэтэр сулууспа» МХТ салайааччыта Айаал Егинов.
Дьиэҕэ чугаһыыр суоллары аспааллааһыҥҥа сыһыаннаах иккис боппуруоска куораты тутууга уонна тырааныспар инфраструкуратыгар Департамент начаалынньыга Северина Архипова чуолкайдаабытынан, тиэргэн территориялара сыл аайы өрөмүөннэнэр буолуохтара. Ол курдук, кэлэр сылга 75 тиэргэн  өрөмүөннэнэрэ былааннанар. Саамай сыаналааҕынан дьиэҕэ чугаһыыр суоллары аспааллааһын буолар диэн кини эбэн эппит. 
Итини таһынан, хамыыһыйаҕа «Якутдорстрой» уонна «Жилкомсервис» тиэхиньикэлэрин пааркатын саҥардыыны, «Кыайыы Пааркатын» салгыы тупсарыыны, таһынааҕы реклама ырыынагын уонна реклама конструкцияларын туруорууну дьүүллэспиттэр. Бэлиэтээн этиллибитинэн, аукционнарга кыттааччы ахсаана аҕыйах, тоҕо диэтэххэ таһынааҕы рекламаны социальнай ситимнэр үтүрүйбүттэр. 
«Правила землепользования и застройки городского округа «город Якутск» диэҥҥэ уларыйыылары киллэрии боппуруоһа көрүллүбүт. Уларыйыы спордунан дьарыктанар балаһааккалары эбии чааһын таарыйбыт. 
Тулагы Киллэм нэһилиэгин историятын пааматынньыктарын үйэтитэр сыаллаах Киллэм сэлиэнньэтин уулусса-суол ситимнэригэр «Якутскай» сопхуос ыанньыксыттарын уонна Аҕа дойду Улуу сэриитин бэтэрээннэрин ааттарын иҥэриэххэ диэн этии киирбит.