Саҥа 2022 сылы көрсөргө бэлэмҥин дуо?

Күүтүүлээх-кэтэһиилээх 2022 сылбыт үүнэрэ ыйы кыайбат эрэ кэм хаалла. Дьиэни хайдах киэргэтэбит, тугу таҥнабыт, астыыбыт диэн ыйытыылар элбэх киһини долгутар буолуохтаахтар. Онон биһиги эрдэттэн бэлэмнэнэ, толкуйдуу сылдьыҥ диэн күндү ааҕааччыларбытыгар сүбэ-ама бэчээттииргэ быһаарынныбыт.

Кэлэр сыл бэлиэтэ – Халлаан күөх өҥнөөх Баабыр. Кинини манньытар, киниэхэ ис буолар инниттэн, сылбыт ситиһиилээх ааһарын туһугар тугу гыныахха нааданый? Илиҥҥи халандаарынан, Баабыр сыла 2022 сыл олунньу 1 күнүттэн саҕаланар, оттон биһиги онуоха диэри кэтэһэ барбаппыт, Саҥа дьыл түүн саҥа сылга үктэнэр сиэри-туому, үгэстэри тутуһабыт.

Бары хайыы-үйэ кэлэр сылбыт бэлиэтин билэбит, кини өҥүн-дьүһүнүн, майгытын-сигилитин эмиэ оҕо эрдэхпититтэн билэбит. Онон сүрүн болҕомтобутун таҥаспытыгар, аспытыгар ууран, эриэн-быраан гына сатыыбыт. Бу кыылбыт тугу сөбүлээн аһыырын эмиэ үөрэтиэхтээхпит.

Баабыр – кытайдыы гороскопка үһүс бэлиэнэн сылдьар. Номох кэпсииринэн, эриэн кыыл, киниттэн ордук ким да суох, киниэхэ тэҥнээх эмиэ суох, кини күүһэ, эниэргийэтэ үрдүктэн үрдүк билиниини ылыахтаах диэн эрэллээх эбит. Оттон кытайдар гороскоптарын уочаратынан араартааһын буолбутугар, Баабыр бастакы буолуом диэн эрэммит. Ол эрэн, Крыса киитэрэй буолан, бастакы миэстэҕэ турбут, Оҕус үлэһит, кыһамньылаах, сүрэхтээх буолан, иккис кэрдиискэ тахсыбыт. Түмүккэ, Баабыр үһүс миэстэнэн муҥурдаммыт. Ол да буоллар бэйэтин билинэр, улахамсык Баабыр Кытайга кыыллар ыраахтааҕыларынан биллэр. Кини – куһаҕан тыыны кыйдыыр күүс-уох уонна хорсун санаа бэлиэтэ буолар.

Баабыры үөрдэр туһуттан тугу таҥнабыт?

Баабыр гороскопка баар 12 кыылтан саамай кыраһыабай уонна күүстээх кыыл диэн ааҕыллар, буойуннуу килбиэн, хорсун санаалаах. Онон кинини үөрдэр инниттэн сөптөөхтүк таҥныахтаахпыт, симэниэхтээхпит.

Биир номоххо этиллэринэн, хаһан эрэ буйвол баабыры кыайбыт. Онтон ыла сиэмэх кыыл оҕустары уонна ынахтары сөбүлээбэт буолбут. Онон бырааһынньыкка былырыын, 2021 сылы, Оҕус сылын көрсөргө кэппит таҥаскытын кэппэккит. Баабыр маныаха урукку кыайтарбытын санаан хомойуон сөп.

Саҥа 2022 сылы натуральнай матырыйаалтан таҥаһынан көрсөр ордук, ол-бу синтетика, искусственнай буолбакка. Солко, заамса, тирии – бу киэргэнэргэ саамай барсаллар.

Дьиэбитин хайдах киэргэтэбит?

Өскөтүн эһиги Баабыры үөрдүөххүтүн баҕарар буоллаххытына, болҕомтоҕутун мас эбэтэр тимир малларга ууруҥ (вазалар, декоративнай фигуралар уо.д.а.). Маннык кыракый маллары остуолгутун эбэтэр хосторгутун киэргэтэргэ туттуҥ. Остуолгутун таҥас сабыынан бүрүйүҥ уонна хас биирдии ыалдьыкка лүөн салпыакката ууруҥ. Сымнаҕас боолдьохтон илиинэн тугу барытын оҥоруоххутун сөп. Салпыакка кэтэрдэр ии, хас ыалдьыт аайы тэриэлкэ анныгар ууруллар таҥас, ону таһынан харыйа, остуолга ууруллар эбэтэр харыйаҕа ыйанар баабыр фигуралара. Баабыр – төһө да сиэмэх кыыл буоллар, син биир куоска бииһин ууһа, онон кини сымнаҕаһы уонна сылааһы сөбүлүүр.

Баабыр эриэн буоларын бары билэҕит. Онон киэргэтиигэ хараҥа бороҥнуҥу өҥү туттуҥ. Манан эһиги, Кытай гороскобунан, баайы-дуолу, үбү-харчыны тардыаххыт. Кинини төһөнөн астыннараҕыт да, соччонон кини 2022 сыл тухары эһигини харыстыа, араҥаччылыа. Эриэн дьурааны араас малынан, көмүс, бороҥ, кыһыллыҥы-бороҥ эбэтэр үрүҥ көмүстүҥү сиэрэй өҥнөрүнэн оҥорон, эбэн биэриҥ.

Дьолу тардар саҥа дьыллааҕы билгэлэр

Баабыр — биир тэҥ, холку кыыл, оннооҕор булка. Онон бырааһынньыкка ыксаабакка, холкутук бэлэмнэниҥ – бигэтик уонна эрдэттэн.

Дьиэҕитигэр-уоккутугар дэлэгэй, байым олох кэлэрин туһугар, бырааһынньык иннинэ кумааһынньыккытыгар бөдөҥ күпүүрэни угуҥ, баар буоллаҕына саҥаны, “хачыгыраһы”. Өссө табылыннаҕына, туох баар иэстэргититтэн эрдэттэн босхолонуҥ, Баабыр маны сыаналыа.

Бырааһынньык түүн дьиэҕит ыраас, сибиэһэй буоллун. Баабыр бэйэтин сүрдээх сыаналыыр кыыл, ыһыллыыны-тоҕуллууну сөбүлээбэт, оннооҕор киэргэли, аһара талымастаабакка, наадалааҕы, билиҥҥи кэмҥэ барсары ылыҥ.

Саҥа дьыллааҕы остуол сарсыардааҥҥа диэри кураанах туруо суохтаах. Ыалдьыттар төһө да итии аһылыгы, сокуускалары бүтэрдиннэр, син биир фрукта, минньигэс аһылык, утах баара ордук.

Баабыр – соҕотох сылдьарын сөбүлүүр, онон айдааннаах хампаанньалартан туоруу сатыыр. Онон бу Саҥа дьылы дьиэ кэргэҥҥитин эбэтэр чугас доҕотторгутун кытары көрсүҥ.

Таҥаскытыгар, киэргэлгитигэр “куоска” бэлиэлэрин, бүгүүрэлэрин иилинимэҥ – Баабырга утарылаһыыны оҥорумаҥ.

Хобордооҕу эбэтэр массыынаҕа аналлаах маллары бэлэхтээмэҥ – Баабыр хаһаайыстыбаҕа сыһыаннаах бэлэхтэри наһаа омнуолаабат. Ол оннугар парфюмерия, аксессуардар, таҥас – сөптөөхтөр.

Бырааһынньык иннинээҕи күнү үчүгэй настарыанньалаах атаарыҥ: күүлэйдээҥ, чугас дьоҥҥутун кытта кэпсэтиҥ, үтүөҕэ, кэрэҕэ эрэ тардыһыҥ. Эһиги бырааһынньыкка бэлэмнэммиккит ыраатта дии? Онон эргэ сылгыт бүтэһик чаастарын, күннэрин үөрэ-көтө атаарыҥ.

Харыйабытын симиибит

Киирэр ааҥҥа харыйаттан иилии өрүллэн оҥоһуллубут киэргэли ыйааҥ, истиэнэлэргитин харыйа лабааларынан киэргэтиҥ эбэтэр вазаҕа угуҥ уонна кыракый харыйа курдук симээҥ. Баабыр – тыа олохтооҕо, оҥоһук харыйаны наһаа сөбүлүө суоҕа, оттон тыыннаах харыйаҕа үөрүө.

Боростуой, чаҕылхай гирляндалары талыҥ, истиэнэ кыйа эбэтэр түннүк үрдүгэр иилиҥ. Түннүк өстүөкүлэтин саҥа дьыллааҕы эҕэрдэ суругунан киэргэтиҥ – ол эрэн элбэх өҥүнэн үлүһүйүмэҥ: маҥан эбэтэр сырдык халлаан күөх кыраасканы ылыҥ, остуоруйа ойуурун уруһуйдааҥ – Баабыры бэйэтин, хаар кыырпахтарын уонна оһуордары. Чүмэчини хаһааныҥ, саҥа дьыллааҕы эрэ түүн буолбакка, ахсынньы ханнык баҕарар киэһэтигэр настарыанньаҕытын көтөҕөн уматыҥ.

Оҕолоргутун кытары хаар кыырпахтарын, бөдөҥ, көстүүлээх сулустары өҥнөөх кумааҕыттан оҥоруҥ – маныаха маҥан, сырдык, хараҥа халлаан күөхтэри туттуҥ. Люстраҕытыгар оҕуруота уонна лиэнтэлээх харыйа саардарын иилиҥ.

Дьиэҕит саамай сүрүн киэргэлэ, биллэн турар – харыйа. Эрдэ эппиппит курдук, Баабыр искусственнай харыйаны буолбакка, дьиҥнээх ойууртан аҕалыллыбыт харыйаны сөбүлүүрүн умнумаҥ, кылаабынайа, бырааһынньыктааҕы маскытын олус үчүгэйдик киэргэтиҥ.

Илиҥҥи өйдөбүлүнэн, дьиэҕэ баар хас биирдии миэстэ туһунан энергетикалаах. 

Дьиэлээхтэр доруобуйаларын бөҕөргөтөр туһуттан, харыйаны хос ортотугар туруоруҥ, манна олох эниэргийэтэ мунньустар. 

Хос илин өттүгэр турбут харыйа дьиэ кэргэн үтүө туругун бөҕөргөтүө.

Оттон харыйаны хос соҕуруу өттүгэр симээтэххинэ, бу уопсастыба билиниитин аҕалыа – үлэҕэр, оскуолаҕа, оннооҕор уһуйааҥҥа.

Арҕаа туруоруллубут харыйа таптал иэйиитин күүһүрдэр.

Хос хоту өттө үп-харчы хонуутун уонна карьера үрдээһинин бигэ тирэхтиэ.

Киэргэтиигэ элбэх өҥү туттартан уонна аһара элбэх киэргэл ыйыыртан туттунуҥ. Бу сылга харыйаҕытын биир тэҥ өҥүнэн, истиилинэн симии сатааҥ.

Баабыр сылыгар сиэр-туом 

“Саҥа дьылы хайдах көрсөҕүн да, сылгын оннук атаараҕын” диэн муударай этии баар. Манна дьон барыта да итэҕэйэр, ол иһин бырааһынньыгы бэһиэлэйдик уонна интэриэһинэйдик көрсө сатыыбыт. Онон норуоттан хаалбыт сиэри-туому билсиэххэ.

Саҥа дьыл түүн түннүккэ кэлэн ырдьыгынаа — бу ситиһиини, харчыны уонна нус-хас олоҕу тардыа.

Сулумах сылдьар кыргыттар саҥа 2022 сыл бастакы мүнүүтэтигэр кэргэнэ суох уолу кытта “сыллаһыҥ”. Манан эһиги олоххутугар тапталы тардыаххыт.

Харчыны тардар туһуттан эргэ сыл бүтэһик мүнүүтэтигэр мандаринна сиэҥ.

Сылаас сыһыаннаах пааралар – бырааһынньык бастакы мүнүүтэтигэр таптыыр киһигитин уурааҥ, Баабыр сылыгар өйдөһүү куруук баар буолуо.

Баҕа санааҕыт туоларын туһугар – кумааҕыга суруйуҥ, уматыҥ, күлүн бакаалгытыгар кутан кураан тыаһын кэмигэр иһэн кэбиһиҥ.

Дьиэҕитигэр харчы “үрүйэлии” устарын туһугар, боруок аттынааҕы көбүөр эбэтэр ыскаатар анныгар ханнык баҕарар манньыат харчыны угуҥ. 

Дэлэгэй, байым олоҕу баай, толору астаах остуол кэрэһилиир, төгүрүк быһыылаах буолара өссө ордук.

Бырааһынньык кэмигэр хаҥас илиигит кыһыйдаҕына, сутуруктуу тутуҥ уонна сиэпкитигэр уктуҥ, ол кэннэ дьэ тарбаххытын көннөрүҥ – бу саҥа сылга бөдөҥ суумалаах харчы киириитин бэлиэтэ.

Үп-харчы кэлиитин сүтэрбэт инниттэн, саҥа дьыл иннинэ кимиэхэ да иэс биэримэҥ.

Остуолга олоруоххут иннинэ, “дьиэ иччитин” санаатын табыҥ – куухунаҕа сампааннаах бакаал эбэтэр туох эмит минньигэс астаах тэриэлкэни хаалларыҥ.

Баабыр сылын иэстээх көрсүмэҥ, кимтэн да бырааһынньык иннинэ харчы иэстээмэҥ.

Саҥа дьылы киэргэтиитэ, харыйата суох дьиэҕэ көрсүмэҥ, саатар биир лабаата ыйааҥ.

Саҥа дьыл күн, киэһэ хойут, таҥас эбэтэр муоста сууйумаҥ.

Саҥа дьыл киэһэ тимэх тигимэҥ, таҥаһы абырахтаамаҥ.

Саҥа дьыл бүтэһик күнүгэр атах таҥаһын, куухуна тээбиринин, дьиэтээҕи таҥаһы атыылаһымаҥ.

Бырааһынньык остуолун аһын куһаҕан настарыанньалаах астаамаҥ, ас бэлэмнии сылдьан кимниин да этиһимэҥ.

Баабыр үүммүт сылыгар остуолу кураанах хаалларымаҥ.

Саҥа дьыл иннинэ тыҥыраххытын уонна баттаххытын кырынымаҥ.

Ааһан эрэ сыл туһунан кэмсиниигитин, хомолтоҕутун таскытыгар таһаарымаҥ, иһиллэр гына этимэҥ.

Бырааһынньык иннинэ үчүгэйи, кэрэни эрэ ыралааҥ: хомойумаҥ, хоргутумаҥ, ытаамаҥ.

Саҥа дьыллааҕы остуолга дьахталлар эрэ буолбакка, хайаан да эр киһи баар буоларын хонтуруоллааҥ.