«Звезднай» дьоҕус түөлбэҕэ өссө икки дьиэ киириэҕэ
2025 сыл иккис аҥаарыгар С секторга элбэх кыбартыыралаах икки дьиэ үлэҕэ киирэрэ былааннанар. Бу уопсайа 7,7 тыһыынчаттан тахса кв. миэтэрэ иэннээх 181 кыбартыыра.
СӨ Баһылыгын уонна Бырабыыталыстыбатын дьаһалтатын пресс-сулууспата иһитиннэрбитинэн, ити дьиэлэргэ үксэ хаарбах туруктаах дьиэлэр олохтоохторо көһүөхтэрэ.
Санатар буоллахха, бу иннинэ саҥа түөлбэҕэ 112 мегаватт кыамталаах өрөспүүбүлүкэ үрдүнэн биир бөдөҥ хочуолунай үлэҕэ киирбитэ, дьоҕус оройуон эбийиэктэрин, ол иһигэр тутулла турар оскуоланы итиинэн хааччыйар. Сыл устата маныаха ыаллыы сытар оройуоннар эбийиэктэрэ холбонуохтара.
Бэлиэтээн эттэххэ, дьоҕус түөлбэҕэ 10-с нүөмэрдээх Оҕо спорт оскуолата, сабыылаах катоктаах уонна киэҥ-куоҥ саалалаах аныгылыы спорт комплекса үлэҕэ киирбитэ.
Билиҥҥи туругунан 990 миэстэлээх оскуола, 315 миэстэлээх уһуйаан, үс олорор дьиэлээх комплекс тутулла тураллар. Манна эбии симиэнэҕэ 200 киһи сылдьар поликлиника дьэндэйиэхтээх.
Уулусса-суол тутуута салҕанар. Аспааллааһын, сырдатыы үлэтэ уонна оптуобус тохтобулларын павильоннарын туруоруу былааннанар.
Хаартыска: Өрөспүүбүлүкэтээҕи ипотека агентствота
Сонуннар
Ордук ааҕаллар
