«Жилкомсервис» МУП кытаанах бөҕү хааччаҕа суох тутар

«Жилкомсервис» МУП куорат полигонугар нэһилиэнньэттэн 1,5 куб/м тиийэ иэннээх кытаанах бөҕү босхо уонна хааччаҕа суох тутар. 
Маннык бэрээдэк Дьокуускай куорат Олохтоох дьаһалтатын 2024 сыл муус устар 17 күнүнээҕи 82п№-дээх «Дьокуускай куорат» куораттааҕы уокурук сиригэр-уотугар санитарнай ыраастаныыга субуотунньуктары уонна тупсарыы үлэтин ыытыы туһунан» дьаһалын 7.2 пуунугар олоҕурар.
> Куорат бөх сүөкүүр полигонун аадырыһа: Бүлүүлүүр суол, 9 км
Бэлиэтээн эттэххэ, маннык миэрэ, бастатан туран, куорат территориятыгар уонна ойуурга көҥүлэ суох сыбаалкалар ахсааннарын аҕыйатарга туһуланар. Куорат баһылыга Евгений Григорьев бэйэтин телеграм-ханаалыгар: «Кистэл буолбатах, сорох ардыгар тиэргэннэртэн, даачалартан эбэтэр кыбартыыра өрөмүөнүн кэнниттэн тиэйиллибит бөх сыбаалкаҕа тиийбэт, бөх контейнердарын таһыгар кыстанан сытар. Ити тупсаҕайдык олоруу быраабылаларын кэһии буолар, саамай куһаҕана, сорохтор бөхтөрүн быраҕыллыбыт учаастактарга уонна ойуурга тиэйэллэр», - диэн бэлиэтээн турар.